बेटी नै नबाँचे बेटी पढाउ, बेटी बचाउ अभियानको औचित्य रहँदैन : जुली महतो

न्यूज ब्यूरो, जनकपुरधाम । संघीय सांसद तथा नेकपा नेतृ जुली महतोले प्रदेश २ मा महिलालाई लक्षित गरी अभियान चलाइएपनि महिला माथिको अन्याय हुने क्रम झन बढ्दै गएको भन्दै दुःख पाखेकी छन् ।

प्रतिनिधिसभाको आईतबारको बैठकमा सांसद महतोले बेटी नै नबाँचे बेटी पढाउ, बेटी बचाउ अभियानको औचित्य नरहने बताएकी हुन् । किशोरीमाथि एसिड आक्रमणका घटना बढ्दै गएको भन्दै कडा कदम चाल्न सरकारको ध्यानाकर्षण समेत उनले गराएकी छन् ।

सांसद महतोले एसिड आक्रमणका घटना नियन्त्रण गरी महिलाको सुरक्षाका लागि कडा कानुन बनाउन सरकारको ध्यानाकर्षण गराइन् । भदौ २० गते शुक्रबार बिहान विद्यालय जाँदै गर्दा वीरगञ्ज महानगरपालिका वडा नम्बर(३, छपकैयाकी १५ वर्षीया मुस्कान खातुनमाथि एसिड आक्रमण भएको थियो । उनको अहिले काठमाण्डौको र्कि्तिपुर अस्पतालमा उपचार भइरहेको छ ।

उनले महिलाको सुरक्षाका लागि संवेदनशील बन्न सरकारलाई सुझाइन् । उनले भनिन्, ‘महिलाको सुरक्षाको लागि कडा कानुन ल्याउन आवश्यक छ । प्रदेश २ मा छोरीमाथि एसिड आक्रमणका घटना धेरै पटक भएकाले रोक्न कडा कदम चाल्नुपर्ने जरुरी छ । प्रदेश २ को सरकारले बेटी पढाउ, बेटी बचाउ अभियान जोडतोडले लागू गरेको छ । बेटी नै बाँचेनन् भने अभियानको औचित्य हुनेछैन ।’

यस्तै, बैठकको शून्य समयमा बोल्दै अन्य सांसदहरुले पनि एसिड आक्रमणबाट घाइते भएकी मुस्कान खातुनको निःशुल्क उपचारको व्यवस्था गरी दोषीलाई कडा कारबाही गर्न सरकारसँग माग गरेका छन् ।