प्रदेश २ सरकार समृद्ध प्रदेशको बाटोमा अग्रसर छ : मन्त्री यादव

न्यूज ब्यूरो, सिरहा । प्रदेश २ सरकारको बेटी पढाउ, बेटी बचाउ अभियान अन्तर्गत सिरहामा साईकल वितरण गरिएको छ ।

प्रदेश २ का आर्थिक मामिला तथा योजना मन्त्री विजय कुमार यादवले सो अभियान अन्तर्गत शुक्रबार सिरहाको औरहीस्थित सुन्दर जनता माविमा साईकल बाँडेका हुन् ।

मन्त्री यादवले १ सय ४२ जना छात्रालाई साईकल हस्तान्तरण गरेको उनका स्वकीय सचिव सुरेन्द्र अधिकारीले जानकारी दिए । साईकल वितरण कार्यक्रमलाई सम्बोधन गर्दै मन्त्री यादवले सहिदको सपनालाई आत्मसात गर्दै प्रदेश २ सरकार समृद्ध प्रदेशको बाटोमा अग्रसर रहेको बताए ।

समृद्ध प्रदेशको परिकल्पना पूरा गर्नको लागि नारी सशक्तिकरण आवश्यक रहेको भन्दै प्रदेश सरकारले यो अभियान चलाएको उनले बताए । समाजवादी पार्टीको मधेश प्रदेश अध्यक्षसमेत रहेका मन्त्री यादव छोरीहरुको लागि यस्ता विभिन्न प्रकारका थप कार्यक्रमहरु ल्याउन पहल थाल्ने प्रतिवद्धता गरे ।

त्यस्तै, प्रदेश कोषाध्यक्ष रेनु यादवले प्रदेश सरकारद्धारा संचालित बेटी पढाउ, बेटी बचाउ अभियानको सराहना गरिन् । यो अभियानले समाजमा रहेको लैङ्किक विभेदलाई अन्त्य गर्ने उनले विश्वास लिइन् ।

मन्त्री यादवको प्रमुख आतिथ्यमा भएको साईकल वितरण कार्यक्रममा विशिष्ट अतिथिमा रेनु यादव लगायत शिक्षक, विद्यार्थी, नागरिकसमाज, राजनीतिकर्मी लगायतको सहभागिता थियो ।