किशोरी एसीड प्रहार प्रकरण : उपचारको लागि प्रदेश सरकारको ५ लाख

न्यूज ब्यूरो, जनकपुरधाम । वीरगञ्जमा एसिड प्रहारबाट गम्भीर घाईते भएकी १५ वर्षीया किशोरी मुस्कान खातुनाको उपचारको लागि प्रदेश २ सरकारले ५ लाख सहयोग गर्ने घोषणा गरेको छ ।

वीरगन्ज महानगरपालिका ३ छप्कैयास्थित मामाको घरमा बसेर पढ्दै आएकी मुस्कान विद्यालय जाँदै गरेको बेला उनीमाथि एसीड प्रहार गर्नेलाई कडा कारवाही गर्ने प्रतिवद्धतासहित उपचारको लागि तत्काल ५ लाख सहयोगको घोषणा गरेको हो ।

वीरगञ्जको रेशमकोठीस्थित त्रिभुवन उच्च माध्यमिक विद्यालय कक्षा ९ मा अध्ययनरत मुस्कानमाथि आज (शुक्रबार) विहान स्थानीय सम्साद आलम र माजिद आलम मिलेर विहान ६ बजे एसीड छ्यापेका थिए । उनको उपचार अहिले काठमाडौंमा भइरहेको छ ।

एसीड प्रहारबाट गम्भीर घाइते मुस्कानलाई उपचारको लागि नारायण उपक्षेत्रीय अस्पताल वीरगञ्जमा भर्ना गरिएको थियो । तर, त्यहाँ उपचार सम्भव नभएपछि काठमाडौं रिफर गरिएको हो ।

यता, एसीड प्रहार गर्ने दुईजना मध्ये सम्साद आलमलाई प्रहरीले पक्राउ गरिसकेको छ । फरार रहेका माजिद आलमको खोजीकार्य जारी रहेको प्रहरीले जनाएको छ ।