हंसपुरका मेयरसहित ३ जना उपर किटानी जाहेरी दर्ता

न्यूज ब्यूरो, जनकपुरधाम । धनुषाको हंसपुर नगरपालिकाका मेयरसहित ३ जना उपर किटानी जाहेरी दर्ता भएको छ ।

नगरपालिकाको कार्यालय सार्ने विषयमा भएको झडपको क्रममा घाइते भएकामध्ये तपेश्वर मण्डलको मृत्यु भएपछि ३ जनामाथि जिल्ला प्रहरी कार्यालय धनुषामा किटानी जाहेरी परेको हो ।

झडपमा गम्भीर घाइते भएका हंसपुर नगरपालिका वडा नम्बर २ बस्ने ५५ वर्षीय तपेश्वर मण्डलको बुधबार राति मृत्यु भएपछि उनको परिवारले जाहेरी दिएका हुन् ।

दुईपक्षीय झडपमा घाइते भई उपचारको क्रममा ज्यान गुमाएका मृतक तपेश्वर मण्डलको परिवारले बिहीबार जिल्ला प्रहरी कार्यालयमा उजुरी दिँदै मेयर रामज्ञान मण्डल, हंसपुर नगरपालिका वडा नम्बर ३ का वडाध्यक्ष उदय सिंहलाई पक्राउ गर्न माग समेत गरेका छन् ।