महोत्तरीमा साईकल वितरण कार्यक्रममा कुटाकुट, वडाध्यक्षको घर घेराउ

न्यूज ब्यूज, महोत्तरी । महोत्तरीमा प्रदेश २ सरकारको ‘बेटी पढाउ बेटी बचाउ’ अभियान अन्तर्गत भइरहेको साईकल वितरण कार्यक्रममा कुटाकुट भएको छ ।

महोत्तरीको बलवा नगरपालिका ७ बनौटाका माध्यमिक विद्यालयमा साईकल वितरण कार्यक्रममा भएको विवाद उग्र बनेपछि कुटाकुट भएको हो ।

साईकल वितरण भइरहेको विद्यालयमा विवाद हुँदा सोही विद्यालयका प्राधानाध्यापक उपर वडाध्यक्षले हातपात समेत गरेका छन् । वडाध्यक्ष बिजय महतोले विद्यालयका प्राधानाध्यापक महेश झामाथि हातपात गरेका हुन् ।

वडाध्यक्षले विद्यालयका प्रधानाध्यापक उपर हातपात गरेपछि त्यहाँको अवस्था अहिले झन तनावग्रस्त बनेको छ । प्रधानाध्यापक माथि हातपात भएपछि विद्यार्थी र स्थानीय बासिन्दाहरु आक्रोशित भएका छन् ।

हातपातको विरोधमा दुईपक्षबीच झडप हुँदा विद्यार्थीहरु समेत घाईते भएका छन् । आक्रोशित स्थानीय तथा विद्यार्थीहरु वडाध्यक्ष महातोको घर समेत घेराउ गरेका छन् । घटनाबारे थप आउन बाँकी छ ।