निजगढमा प्रस्तावित अन्तराष्ट्रिय विमानस्थल त्यहीँ बन्नुपर्छ : मुख्यमन्त्री राउत

न्यूज ब्यूरो, जनकपुरधाम । प्रदेश २ का मुख्यमन्त्री लालबाबु राउतले बाराको निजगढमा प्रस्तावित अन्तराष्ट्रिय विमानस्थल त्यहीँ निर्माण हुनुपर्ने बताएका छन् ।

मुख्यमन्त्री राउतले वीरगञ्जमा सञ्चारकर्मीहरुसँग कुराकानी गर्दै विमानस्थलको निर्माण प्रदेशको समृद्धि र विकाससँग गाँसिएको रहेकोले सोही स्थानमा विमानस्थल बन्नुपर्ने प्रदेश सरकारको धारणा रहेको प्रष्ट पारेका हुन् । प्रदेश सरकार समृद्धि र विकासको पथमा अग्रसर रहेको बताउँदै यसका लागि सबैसँग हातेमालो गर्न प्रदेश सरकार तयार रहेको उनको धारण छ । प्रदेश सरकार विकासको लागि संघीय सरकारसँग समन्वय र सहकार्यमा अघि बढन तयार रहेको उनको कथन थियो ।

विमानस्थल निर्माण कार्य अन्यत्र सार्ने षड्यन्त्र भइरहेको भन्दै बारा निजगढका स्थानीयबासी आन्दोलित रहेको अवस्थामा मुख्यमन्त्री राउतको सो कथन बाहिर आएको हो । प्रदेश २ मा रहेको राजपा–समाजवादी गठबन्धन सरकारका केही मन्त्रीहरु भने त्यहाँको रुख काट्न नदिने र प्रदेशभित्रकै अरू खाली जमिनमा विमानस्थल बनाउनुपर्ने पक्षमा छ ।