न्याय पाएनौ भने जनकपुरका हजारौं युवा आन्दोलनमा जान्छौंः युवा नेता झा

न्यूज ब्यूरो, जनकपुरधाम । युथ एक्सन फोर्सका सँयोजक प्रशान्त झाले प्रशासनबाट न्याय नमिले हजारौं युवक आन्दोलनमा उत्रने चेतावनी दिएका छन् ।

जनकपुर युथ एक्सन फोर्सका सँयोजक झाको नेतृत्वमा गएको युवकहरुको टोलीले गत विहिबार जनकपुरमा भएको युवा नेता एवम् युवा अगुवा शुशिल कर्ण उपर प्रहरीले सुनियोजित तवरले प्रहार गरेको भन्दै कारवाहीको लागि धनुषाका प्रमुख जिल्ला अधिकारीलाई आईतबार ज्ञापन पत्र बुझाएको हो । जनकपुरको मुटु जानकी चोकमा नरिवल बेचेर गुजारा गर्दै आएका एक युवकलाई घुस नदिएको झोंकमा कुटपिट गरेको तथा त्यसको भिडियो गरिबका अगुवा शुशिल कर्णले खिचेर समाजिक सँजाल फेसबुकमा हालेपछि उनलाई चौकीमा बोलाएर दुरव्यहार गरेपछि युवाहरु आन्दोलित भएका हुन् ।

प्रमुख जिल्ला अधिकारी (सिडिओ) प्रदीपराज कनेललाई ज्ञापन पत्र बुझाउँदै उनीहरुले प्रशासनले त्यस घटना उपर निकाले विज्ञप्ति त्रुटिपूर्ण रहेको ठहर गर्दै युवाहरु सँग प्रहरीले गरेको व्यवहार अमानवीय र मावन अधिकारको विरुद्ध रहेको ठोकुवा गरेको हो । ज्ञापनपत्रमा ‘घटनाले नेपालको मूल कानुनलाई चुनौती दिंदै प्रहरी प्रशासनले राईट टु युथ ईम्पावरमेन्ट, राईट टु लिभ विथ डिग्निटी,रा ईट टु युथ, जस्ता मानवअधिकारको हनन गरेको उल्लेख छ ।

घटना भएपछि केही बेर आन्दोलनमा उत्रेका युवाहरुले जिल्ला प्रहरी कार्यालय धनुषा अगाडी समेत प्रर्दशन गरेको थियो । त्यसपछि बेलुका जिल्ला प्रहरी कार्यालय धनुषाले सो घटना बारे बुझेको र प्रहरीको कुनै दोष पनि नरहेको तथा कारवाहीको लागि प्रक्रिया अगाडी पनि बढाएको लेखिएपछि युथ एक्सन फोर्सले त्यो विज्ञप्ति नै दुविधाजनक रहेको बताएको छ । गत विहिबारको सो घटना दुई समूहबिचको झै झगडा नभई प्रहरीद्वारा सुनियोजित रुपमा घटाईएको घटना रहेको भन्दै रक्षक प्रहरी नै भक्षक भएको महशुस हुन लागेकोले घटनाको सत्य तथ्य छानविन गरी दोषी उपर कडा कारवाहीको माग समेत गरिएको हो ।

सिडिओ कनेललाई ज्ञापनपत्र बुझाउँदै युवाहरुले जनकपुर जस्तो ठाउँमा प्रहरीबाटै युवा अगुवाहरु असुरक्षित महसुस गर्न लागेको भन्दै यस्ता प्रहरीलाई कानुनको दायरामा ल्याएर सुरक्षाको अनुभूति गराइदिन माग गरेका हुन् । उनीहरुले समयमै माग पूरा नभए जनकपुरका युवाहरुलाई लिएर सडक तताउने चेतावनी समेत ज्ञापनपत्र मार्फत दिएको हो । विहिबार दिउँसो युवा अगुवा शुशिल कर्णलाई बोलाएर जानकी मन्दिरको पर्यटन प्रहरीमा खटिएका एक प्रहरीले दुरव्यहार गर्दै लुगा समेत च्यातिदिएपछि युवाहरु तातिएका छन् ।