संघीयता र गणतन्त्र समाप्त पार्ने चलखेल सुरु भयो : उपेन्द्र यादव

न्यूज ब्यूरो, वीरगन्ज । नेपाल सरकारका उपप्रधान तथा स्वास्थ्य जनसंख्यामन्त्री उपेन्द्र यादवले संघीयता र गणतन्त्र समाप्त पार्ने चलखेल सुरु भएको बताएका छन् ।

वीरगन्ज बस टर्मिनलको मंगलबार उद्घाटन गर्दै मन्त्री यादवले अधिकारको लडाई लड्दा अधिकार प्राप्त भएपनि संघीयता र गणतन्त्रलाई नै समाप्त पार्ने चलखेल सुरु भएको बताएका हुन् ।

प्राप्त उपलब्धि माथि चौतर्फी ग्रहण लागेको बताएका भन्दै खतरामा रहेको लोकतन्त्र, गणतन्त्र र संघीयतालाई बचाउँनुपर्ने जिकिर गरे । विभेद र समानतालाई अन्त्य गरी जिम्मेवारी र दायित्वका साथ अघि बढ्नुपर्ने उनको भनाई थियो ।

मन्त्री यादवले भएको श्रोत र साधनको सदुपयोग गरी विकासको गतिलाई तीव्र रुपमा अगाडि बढाउँनुपर्ने धारण व्यक्त गरे ।

उद्घाटन कार्यक्रममा प्रदेश २ का मुख्यमन्त्री लालबाबु राउतले जनताको अपेक्षा अनुसार विकास निर्माणका काम हुन नसकेको बताएका छन् । उनले आफूहरुलाई जनताले विकास गर्न मत दिएर पठाएपनि उनीहरूको मतको कदर गर्न नसकेको जिकिर गरे ।