अवरुद्ध जनकपुर–ढल्केबर राजमार्ग खुलाइयो

न्यूज ब्यूरो, जनकपुरधाम । जनकपृुर–ढल्केबर सडक खण्डमा गरिएको चक्कजाम खुलाइएको छ । धुलो उडेको भन्दै स्थानीयहरुले अवरुद्ध पारेको सडक सहमति पछि खुलाइएको हो ।

धनुषाको लक्ष्मीनिया गाउँपालिकास्थित सपहीमा स्थानीयबासिन्दाले मंगलबार विहान ८ बजेदेखि जनकपुर ढल्केबर सडक खण्डमा १ घण्टा चक्काजाम गरेका हुन् । ६ लेन सडक निर्माणको क्रममा ठेकेदारले पानी नछर्केपछि उडेको धुलोले आफुहरुको स्वास्थ्यमा निकै समस्या भएको भन्दै चक्काजाम गरेका थिए ।

सडक अवरुद्ध भएपछि प्रहरीले स्थानीय र ठेकेदारबीच सहमति गराएर सडक खुलाएको हो । ठेकेदारले २० दिन भित्रमा सडक निर्माणको काम सम्पन्न गर्ने र निर्माण अवधिमा सडकमा पानी पटाउने सहमति गरेपछि सडक खुलाइएको ईलाका प्रहरी कार्यालय महेन्द्रनगरका ईन्सपेक्टर अमिर दाहालले न्यूज ब्यूरोसँग भने ।

चक्काजाम खुलाइएसँगै आवागमन सूचारु भएको छ ।