थरुहट–थारुवान राष्ट्रिय मोर्चाद्धारा सरकारविरुद्ध आन्दोलन घोषणा !

न्यूज ब्यूरो, जनकपुरधाम । टीकापुरमा सम्पन्न थारु सम्मेलनबाट गठित थरुहट–थारुवान राष्ट्रिय मोर्चाले थरुहट एकता र सामजिक सद्भावका लागि भन्दै सरकारविरुद्ध आन्दोलनको घोषणा गरेको छ ।

थरुहट नेता लक्ष्मण थारुको संयोजकत्वमा गठन भएको ५१ सदस्यीय थरुहट–थारुवान राष्ट्रिय मोर्चाले १५ बुँदे टीकापुर घोषणापत्र जारी गर्दै सरकारविरुद्ध असहयोग आन्दोलन घोषणा गरेको हो ।

टीकापुरमा सम्पन्न सम्मेलनले पहिचान पक्षधरलाई एकताबद्ध गरेको घोषणा पत्रमा उल्लेख गरेको छ । बिग्रिएको भनिएको टीकापुरको सामाजिक सद्भाव मजबुत भएको घोषणा पत्रमा भनिएको छ । तराई मधेशमा जारी आन्दोलनपछि छानबिन गर्न गठित गिरिशचन्द्र लालसहितको विभिन्न प्रतिवेदन सार्वजनिक गर्न सरकारसँग माग गरिएको पनि मोर्चाका प्रवक्ता मीनराज चौधरीले जानकारी दिए ।

गएको भदौ ८ गते कर्फ्यू जारी भएकै अवस्थामा टीकापुरका थारु समुदायको भौतिक संरचनामा आगजनी गर्नेलाई तत्काल कानुनी दायरामा ल्याउनुपर्ने माग समेत गरिएको छ भने संघर्ष समिति र सरकारबीच विभिन्न समयमा भएको १३ बुँदे सहमति कार्यान्वयन गर्न पनि घोषणा पत्रमार्फत माग गरिएको छ ।

हालको ७ प्रदेशको संरचना कुनैपनि हालतमा नमान्ने उद्घोष गर्दै जातीय पृष्ठभूमिको आधारमा पहिचानसहितको १० जोड १ को थरुहट–थारुवान स्वायत्त प्रदेश सीमांकन र नामांकन गरिनुपर्ने माग सारिएको छ । त्यस्तै संघीय निजामती ऐन संशोधन गरी राज्यका सबै निकायमा जातीय जनसंख्याको आधारमा लोक सेवा आयोगले विज्ञापन जारी गर्नुपर्ने घोषणा पत्रमा उल्लेख भएको प्रवक्ता चौधरीले बताए ।

त्यस्तै सम्मेलनले तीन चरणको आन्दोलनको तालिका तय गरेको छ । पहिलो चर अन्तर्गत तराईका जिल्लामा प्रचारात्मक तथा संगठन विस्तारको कार्यक्रम अगाडि बढाउने भएको छ । दोस्रो चरणमा कोणसभा, विरोधसभा, र्याली, जनप्रदर्शनका कार्यक्रमलाई मोर्चाले तराईका जिल्लामा सशक्त रुपमा सञ्चालन गर्ने रणनीति तय गरेको छ ।

त्यस्तै दोस्रो चरणमा नै तराई जिल्लाका १० ठाउँमा आमसभा गर्ने जनाएको छ । तर, ठाउँ र समय भने तय हुन बाँकी रहेको प्रवक्ता चौधरीले बताए । मोर्चाले संविधान जारी भएको दिन असोज ३ गतेलाई कालो दिनको रुपमा मनाउने जनाएको छ ।

मोर्चाले आफ्नो तेस्रो चरणको कार्यक्रमअन्तर्गत थारु बहुल क्षेत्रमा लाठी जुलुस, मसाल जुलुस प्रदर्शन गर्ने, सरकारविरुद्ध असहयोग आन्दोलन गर्ने अभियान सञ्चालन गर्ने भएको छ ।