महिलामुखी बजेट निर्धारणका लागि जनप्रतिनिधिलाई ३ दिने तालिम, दत्तले यस्तो भने !

न्यूज ब्यूरो, जनकपुरधाम । प्रदेश २ को धनुषा जिल्लाको ८ वटा पालिकाका जनप्रतिनिधि र कर्मचारीहरुलाई महिलामुखी बजेट निर्धारणका लागि ३ दिने तालिम सुरु गरिएको छ ।

ओरेक नेपालको आयोजनामा जनकपुरधाम उपमहानगरपालिकासहित धनुषाका ८ वटा पालिकाका प्रमुख, उपप्रमुख र प्रशासकीय अधिकृतहरुलाई तालिम दिन लागिएको हो ।

जनकपुरधामस्थित एक होटेलमा आईतबारदेखि सुरु भएको तालिमको नेपाल सरकारको संवैधानिक अंग मधेशी आयोगका अध्यक्ष डा. विजय दत्तले विधिवत् उद्घाटन गरेका छन् । तालिमको उद्घाटन गर्दै आयोगका अध्यक्ष दत्तले तालिम सफलताको शुभकामना दिँदै समावेशी तवरले काम गर्न सबैलाई आग्रह गरे ।

ओरेक नेपालका कार्यक्रम संयोजक सविता पोखरेलको आतिथ्यमा महिलामुखी बिकास र लैङ्गकमैत्री योजना तर्जुमा तथा बजेट निर्धारणका लागि ३ दिने तालिमको शुभारम्भ गरिएको ओरेक नेपाल धनुषा जिल्ला परियोजना संयोजक रोजलिन सिंह बछारले जनाइन् । ८ पालिकाबाट ३० जना सहभागीलाई ३ दुने तालिमको क्रममा लक्ष्मी अर्याल र धमकेश्वर ओझाले प्रशिक्षण गर्ने ओरेकका एसोसिएट कार्यक्रम अधिकृत बिना सिंहले बताइन् ।

स्थानीय तहहरुले बजेट छुट्याउदा अधिकांश पालिकाहरुमा बालबालिका, अपांग, महिला र अल्पसंख्यकहरुका लागि रकम नछुट्याउने गरिएको देखिएकाले यस्तो कार्यक्रमको आयोजना गरिएको हो । तालिम पश्चात् अनुगमन समिति समेत गठन गरिने ओरेकका परियोजना संयोजक बछारले जानकारी दिइन् ।