मधेशमा पनि विप्लवको त्रास, रौतहटको एक वडा कार्यालयमा आगजनी

न्यूज ब्यूरो, मधेश । नेत्रविक्रम चन्द नेतृत्वको विप्लव माओवादीले आज नेपाल बन्दको घोषणा गरेपछि जनजीवन प्रभावित भएको छ ।

विप्लव बन्दका कारण जनकपुर (धनुषा) लगायत आसपासका जिल्लाहरुमा बन्दको प्रभाव कमै देखिएपनि तराई मधेशको कैयौं जिल्लाहरुमा बुधबारको बन्दको त्रास भन्ने फैलिएको देखिएको छ । सो क्रममा प्रदेश नं. २ को रौतहट जिल्लाको एक नगरपालिकाको वडा कार्यालयमा आगजनी भएको छ ।

रौतहटको चन्द्रपुर नगरपालिका– ३ को वडा कार्यालयमा मंगलबार मध्येरातमा आगजनी भएको छ। आगजनीबाट कार्यालयको सम्पूर्ण समान जलेर नष्ट भएको वाड अध्यक्ष रवि देबकोटाले जानकारी दिए । कार्यालय भित्र रहेको कम्प्युटर, दराजलगायतको कागजात जलेर नष्ट भएको उनले बताए।

घटना बारे अनुसन्धान भईरहेको ईलाका प्रहरी कार्यालय चन्द्रनिगाहपुरका डिएसपी कबित कटुवालले बताए। सो वाड कार्यालय नजिकै बम जस्तो देखिने बस्तुले स्थानीय त्रसित भएका छन्। उक्त आगजनी विप्लब समूहले गरेको हुन सक्ने स्थानीयको आशंका छ। साउन १५ गतेको बन्दलाई लक्षित गरि बम राखेको हुन सक्ने अनुमान छ।