जातीवाद : गाउँपालिका अध्यक्षको दबाबमा एउटै विषयको ४ शिक्षक, ५ औं सिफारिस

न्यूज ब्यूरो, जनकपुरधाम । एउटा विद्यालयमा एउटै विषयको ४ वटा शिक्षक नियुक्ती गर्नु भनेको पत्यार नलाग्न सक्छ , तर धनुषाको एक विद्यालयमा जातीवादको पराकाष्ठा नाघेको छ ।

धनुषाको लक्षमीनीयाँ गाउँपालिका वडा नं. ७ कुम्हरौरा स्थित रहेको जनता माविमा पहिलेदेखि नै ४ ४ जना अँग्रेजी विषयको शिक्षक भएपनि पाँचौको लागि गाउँपालिका अध्यक्ष विन्देश्वर यादवले सिफारिस गरेको श्रोतले जानकारी दिएको छ । स्रोतका अनुसार, गाउँपालिका अध्यक्ष यादवकै दबाबमा विद्यालयले अर्को शिक्षक जयराम यादवलाई दरबन्दीमा ल्याउन लागेको खुलेको हो ।

विद्यालयको मावि तहमा अँग्रेजी दरबन्दीमा बृजकुमार यादव छँदाछँदै अर्को शिक्षक ल्याउन लागेको हो । प्रावि तहदेखि निमाविसम्म निजी स्रोत समेत गरी अन्य ३ जना शिक्षक अँग्रेजी विषयकै हुँदाहुँदै पनि अर्को एक जना शिक्षक अँग्रेजीकै ल्याउन लागिएको हो । गाउँपालिका अध्यक्ष यादवले जातीवादलाई प्रश्रय दिएको आरोपविद्यालय शुभचिन्तक, अभिभावक एवम स्थानीय स्रोत रमेश चन्द्र झाले जानकारी दिए ।

"विद्यालयको अवस्था लाजमर्दो छ , धेरै नाजुक छ अवस्था, अब नियुक्ती त विद्यालयले गर्ने हो, विद्यालयको प्रधानाध्यापकले न गर्ने हो ? अहिले कसलाई सिफारिस गरिएको छ मलाई केही थाहा छैन , अहिले विद्यालय बन्द छ , अब खुलेपछि केही भन्न सक्छु ।"- वडा नं. ७ का वडाध्यक्ष गँगा साहले बताए ।

नीजी स्रोत सहित प्रावि तहदेखि मावि सम्म अँग्रेजी विषय पठन पाठन गराउने ४ ४ जना शिक्षक हुँदाहुँदै पनि ५ औं शिक्षकको लागि खाली दरबन्दीमा सिफारिस गरिएको जनाइएको छ । विद्यालयमा मुख्य विषयहरु अनिवार्य गणित, अनिवार्य नेपाली र समाजिक विषय पढाउने शिक्षकको खाँचो भएपनि यी विषयको दरबन्दीमा पुनः अँग्रेजी विषयकै शिक्षक ल्याउन लागेको बुझिएको छ ।

यस सन्दर्भमा न्यूज ब्यूरोसँग कुराकानी गर्दै गाउँपालिका अध्यक्ष विन्देश्वर यादवले -"आफू कुनै प्रकारको दबाब नदिएको प्रतिक्रिया दिदै उनले भने, मैले दबाब दिएको पत्र कहाँ छ ? मैले किन दबाब दिने ? मलाई को टेर्छ र ? मैले हस्ताक्षर गरेको पत्र कत्तै छ भने देखाउनुस् । मैले कुनै दबाब दिएको छैन, जो निर्णय गर्ने हो त्यो हेडमास्टरले गर्ने हो ।"

यता, विद्यालयका प्रधानाध्यापक मनोज कुमार कर्णले भने गाउँपालिका अध्यक्ष यादवकै अधिक दबाब भएकोले आफू पुनः अँग्रेजी विषयकै शिक्षकको लागि निर्णय गरेको बताएका छन् । न्यूज ब्यूरोसँगको कुराकानीमा प्रअ कर्णले अध्यक्ष यादवले अँग्रेजी विषयको शिक्षक जयराम यादवलाई सिफारिस गर्न दबाब दिएको बताएका छन् ।

विद्यालयमा गणित, नेपाली र समाजिक विषयको शिक्षकको खाँचोका कारण विद्यार्थीहरुको पठनपाठन समेत अवरोध र असहज बनेको अवस्था सृजना भएपनि जातिवादको मानसिकताका कारण बालबालिकाहरुको भविष्यदेखि खेलवाड गरिएको आरोप एक स्थानीयले लगाए । उनले बालबालिकाको भविष्यदेखि कुनै मतलब नरहेको र जातीवादकै कारण भोट बैंक खोल्ने उदेश्यले यस्तो गर्न लागेको बताए ।

यस तथ्य बारे भने विद्यार्थीका अभिभावकहरु अनभिज्ञ छन् । व्यवस्थापन समिति समेत नरहेको विद्यालयमा गाउँपालिका शिक्षा समितिले गरेको निर्णयलाई सर्व स्वीकार गरिएपनि बालबालिकाको हितमा भने उक्त निर्णय नभएको बताइएको छ ।