श्रावणमा शिव मन्दिरको उद्घाटन गर्दै सांसद यादवले भने, ‘आजदेखि विकासको श्रीगणेश भयो’

न्यूज ब्यूरो, सिरहा । राष्ट्रिय जनता पार्टी (राजपा) नेपालका संयोजक तथा संघीय सांसद राजकिशोर यादवले आफ्नो निर्वाचन क्षेत्रमा गरेका विकास निर्माणका कार्यलाई विधिवत् रुपमा श्रीगणेश गरेका छन् ।

सिरहा निर्वाचन क्षेत्र नं. ४ बाट निर्वाचित सांसद यादवले श्रावणको पहिलो सोमबारको अवसर पारेर शिव मन्दिरको उद्घाटन गरी आजदेखि विकास निर्माणका कार्यलाई विधिवत् रुपमा श्रीगणेश गरेका हुन् ।

हिजोमात्रै राजपाको संयोजकमा चयन भएका नेता यादव आजदेखि संयोजकको जिम्मेवारी सम्हाल्नु पूर्व सिरहाको मिर्चैया नगरपालिका–११ सितापुरमा नव निर्मित शिव मन्दिरको उद्घाटन तथा भगवान शिवको पूजापाठ गर्दै विकास निर्माण कार्यको सुरुवात गरे ।

विकास निर्माणको दृष्टिकोणले अग्र मानिएको सिरहा क्षेत्र नं. ४ मा सम्पन्न विभिन्न काम तथा योजनाको उद्घाटन कार्य विशेष दिन पारेर शिव मन्दिरबाटै सुरुवात गरेको सांसद यादवले बताएका छन् । विकास निर्माणका सबालमा अगाडि देखिएका नेता यादव जनताको चाहना नै आफ्नो कार्ययोजना भएको सुनाए ।

सांसद यादवले आफ्नो निर्वाचन क्षेत्रका जनताको चाहना र अवश्यकतालाई कार्ययोजना मानेर अगाडि बढेको र पूरा गर्न लागिपरेको जनाए । उनले भने, ‘चुनावी मैदानमा हुँदा व्यक्त गरेका प्रतिवद्धता त म पुरा गर्छु नै, सँगै यहाँका जनतालाई विकासको मामिलामा थप अनुभूति गराउनेछु । जनताका हरेक डिमाण्डप्रति शंवेदनशील र प्रतिवद्ध छु ।’

विकास निर्माणको काममा पार्टी आस्थाबाट माथि उठेर लाग्न पनि उनले सबैलाई आग्रह गरे । उनले भने, ‘राजनीतिक कुरा बेग्लै हुन्, पार्टी भन्दा माथि उठेर देश, समाज र जनताको लागि काम गर्नुपर्दछ ।’ सांसद यादवको संसदीय विकास कोषको लगानीमा सिरहा क्षेत्र नं. ४ अन्तर्गत पर्ने विभिन्न स्थानहरुमा थुप्रै योजना तथा कार्यहरु जारी छन् भने केही योजनाहरु सम्पन्न भइसकेका छन् ।