चुरेदेखि भारतीय सीमासम्म तटबन्ध लगाउनुपर्छ : नेता अरगरिया

न्यूज ब्यूरो, जनकपुरधाम । तराई मधेशमा गएको विकराल बाढीबाट पीडितहरुको राहत तथा पुननिर्माणको लागि संघीय संसदमा प्रस्ताव दर्ता गरिएको छ ।

गत साउन ३ गते संघीय सँसदमा नेकपामा नेता प्रभु साहले राखेको प्रस्तावमा समर्थन गर्दै नेता अरगरियाले बाढी पीडितको लागि राहत तथा पुन निर्माण सम्बन्धी प्रस्ताव दर्ता गरिएको छ । दिउँसो १२ः१५ मा दर्ता गरिएको उक्त प्रस्तावको दर्ता नं. १० रहेको छ ।

दर्ता गरिएको प्रस्तावमा असार २६ गतेदेखि लगातार भएको अबिरल बर्षाका कारण मुलुकभर आम जनजीवन नै कष्टकर भई तराई मधेशमा ठुलो परिमाणमा क्षति भएको छ । बाढी तथा डुबानमा परी झण्डै ६९ जनाको मृत्यू, ३१ बेपत्ता र ३८ जना घाईते हुनुका साथै १६ हजार ५ सय २० बढी घर परिवार विस्थापित भएको आँकडा सरकारलाई सुझाउँदै राहतको लागि प्रस्ताव दर्ता गरिएको हो ।

यसका साथै राजमार्ग अवरुद्ध, विद्युत सेवा अवरुद्ध, खानेपानीको अभाव, विद्यालयहरु क्षतिग्रस्त, स्वास्थ्य उपचार व्यवस्थामा समेत नेपाल सरकारले चासो लिनुपर्ने भएकोले प्रस्ताव पेश गर्नुपरेको बताइएको छ । राज्यले पीडितहरुका लागि तत्काल अस्थायी सुरक्षित आवासको व्यवस्था गर्नुपर्ने, वर्षायामको सुरुवात भएकोले आवश्यक खाद्यान्नको व्यवस्था गर्नुपर्ने, बाढी प्रभावित क्षेत्रका अवरुद्ध सडक, विजुली सँचार लगायतका पूर्वाधारहरु तत्काल सुचारु गर्नुपर्ने लगायतका बुँदाहरु उपर छफफल गर्न प्रस्ताव गरिएको हो ।

यसका साथै राज्यको तर्फबाट मृतकका परिवारलाई सान्तावना स्वरुप कम्तीमा ५ लाख नगद, घाईतेहरुको उपचार तथा बेपत्ता भएका मानिसहरुको खोजी तीव्र पार्नुपर्ने, दुषित खानेपानी, फोहोर मैला र प्रतिकूल वातावरणीय प्रभावका कारण विद्यमान र संभावित स्वास्थ्य सम्बन्धी जोखिमको सामना गर्न आवश्यक स्वास्थ्य सेवाको प्रबन्ध गर्नुपर्ने प्रस्ताव उपर छलफल गर्न माग गरिएको हो ।

प्रस्तावमा बाढी नियन्त्रणको दीर्घकालिन उपाय उपर चुरेदेखि भारतीय सीमासम्म मुख्य नदीहरुमा मजबुत बाँध(तटबन्ध) निर्माण गर्नुपर्ने, नदीको बहाब क्षेत्रमाथिको जग्गा अतिक्रमण रोक्नुपर्ने, प्राकृतिक बहाब नै अवरुद्ध बनाइने जुनसुकै संरचना तथा गतिविधि रोक्नुपर्ने र नदीको गहिराई कायम राख्न चुरे क्षेत्रबाट हुने भू स्खलनका गतिविधि रोक्नुपर्ने बुँदाहरु उपर छलफल गर्न प्रस्ताव दर्ता गरिएको हो ।

नेता साहको प्रस्ताव उपर नेता अरगरिया सहित नेपाली काँग्रेसका अमरेश सिँहले पनि समर्थन जनाएका छन् । बाढी पहिरोका कारण तराई मधेशमा मानवीय र भौतिक क्षति व्यापक भएको छ ।