कमला नियन्त्रणको दीर्घकालिन समाधान हेतु सांसद यादव सहितको टोली ग्राउण्ड जीरोमा

न्यूज ब्यूरो, सिरहा । संघीय सांसद तथा राष्ट्रिय जनता पार्टी नेपालका अध्यक्ष मण्डलका सदस्य राजकिशोर यादवसहितको टोलीले सिरहाको बाढी तथा डुवान क्षेत्रको स्थलगत अनुगमन गरेका छन् ।

संघीय संसदको राज्य व्यवस्था समितिमा समेत रहेका सिरहा निर्वाचन क्षेत्र नं. ४ बाट निर्वाचित राजपा नेता यादवसहित राज्य व्यवस्था समितिको टोलीले शनिबार कमला नदीको बाढीका कारण डुबानमा परेका बस्ती तथा क्षेत्रको स्थलगत निरीक्षण गरेका हुन् ।

विनाशकारी बाढीले वर्षेनी डुबानमा पर्दै आएका क्षेत्रहरुको दीर्घकालिन समाधानका लागि राज्य व्यवस्था समिति सहितको टोली ग्राउण्ड जिरोमै पुगेर अवलोकन गरेका छन् ।

कमला नदीको बाढीबाट अत्ति प्रभावित सिरहाको कल्याणपुर नगरपालिकाको ईटारी प्रसाही, सिरहा नगरपालिकाको बसबिट्टा र सारस्वर तथा कर्जन्हा नगरपालिका ३ मा पर्ने राजमार्ग छेउको सुन्दरपुर लगायतका बस्ती क्षेत्र निरीक्षण गरिएको हो । भिषण वर्षा र विनाशकारी बाढीले यस क्षेत्रमा बढी क्षति पुर्याएको छ ।

अनुगमन टोली लिएर सिरहाको नदी आसपासका प्रभावित घरबस्ती पुगेका सांसद यादवले यस क्षेत्रका बासिन्दा वर्षा र बाढीका कारण वर्षेनी डुबानमा पर्दै आएपनि कसैले चाँसो नलिँदा समस्या जस्ताको त्यस्तै यथावत रहेको जिकिर गरे । बाढी प्रभावित क्षेत्रहरुको अवलोकन गर्दै उनले यहाँको समस्यालाई दिर्घकालिन समाधान गर्न सरकारलाई निर्देशन दिने बताए ।

सिरहाका नदी आसपासका बस्तीको समस्यालाई दीर्घकालिन निकास दिन सरकारलाई चाँडै प्रतिवेदन बुझाउने र समाधानको लागि आश्वयक कदम अगाडि बढाउन लगाउने सांसद यादवले प्रतिवद्धता व्यक्त गरेका छन् । बाढी पीडितको पुनर्स्थापनाका लागि पहल गरिरहेको पनि उनले जनाए ।

अनुगमनका क्रममा कर्जन्हा ३ स्थित कमलाको काँखमै पर्ने राजमार्ग छेउको बाढी प्रभावित सुन्दरपुर भन्ने बस्ती पुगेका सांसद यादवले त्यहाँको समस्या पनि चाँडै समाधान हुने प्रतिवद्धता गरेका छन् । कमला नदीमा आएको बाढी बाँध भत्काएर बस्तीमै पसेपछि डुबानमा परेको थियो । त्यस बस्तीमा ५५ बढी घरपरिवार बसोवास गर्दै आएका छन् ।

यस्तै, कल्याणपुरको ईटारी प्रसाहीमा पनि बाढी पस्दा कयौं परिवार विस्थापितै भएका छन् । उनीहरु अहिले स्थानीय एक सामुदायिक विद्यालयमा शरण लिएका छन् । सिरहाको बसविट्टा र सारस्वरको हालात पनि उही छ । कमलाको बाढीले त्यस क्षेत्रमा वितण्डा मचाएको छ ।

राज्य व्यवस्था तथा सुशासन समितिले बाढी प्रभावित क्षेत्रको निरीक्षणका लागि बनाएको टोलीमा सांसद राजकिशोर यादव, दिलेन्द्र प्रसाद बडु, डिला संग्रौला, यशोदा सुवेदी लगायतका छन् । संघीय संसदबाट आएको अनुगमन टोलीसँगै बाढी प्रभावित क्षेत्रको अवलोकन गर्न प्रदेश २ सरकारका उद्योग, पर्यटन, वन तथा वातावरण राज्यमन्त्री सुरेश मण्डल, सिरहा ३ का प्रतिनिधिसभा सांसद लिलानाथ श्रेष्ठ, प्रदेश सांसद दिलीप साह, रामकुमार यादव, प्रदेश २ का नीति आयोगका सदस्य डा. सुरेन्द्र झा, सिरहाका प्रमुख जिल्ला अधिकारी गोपालप्रसाद अधिकारी, सिरहाका एसपी उमाप्रसाद चतुर्वेदी लगायतका सरिक भए ।

सरकार तथा सम्बन्धित निकायको अगम्भीरपनाले यस भेगका बासिन्दा सदियौंदेखि बाढी र डुबानको समस्या झेल्दै आएको राज्यमन्त्री मण्डलको भनाई थियो । कमला, घुर्मी र बतहा खोलाको नियन्त्रणको लागि तीनै तहका सरकारले अविलम्ब चाँसो लिनुपर्ने उनले औल्याए । यस क्षेत्रको दीर्घकालिन समाधानका लागि प्रदेश सरकार गम्भीर रहेको उनले जनाए ।

जिल्ला विपद् व्यवस्थापन समितिले संकलन गरेको प्रारम्भिक तथ्यांकअनुसार बाढीबाट सिरहाका ५ हजार ३ सय २६ घरमा पूर्ण र १० हजार १ सय ८९ घरमा आंशिक क्षति पुगेको छ । २ हजार ६ सय ३१ परिवार विस्थापित भएका छन् भने बाढीमा परी ४ जनाको मृत्यू पनि भएको छ । प्रजिअ अधिकारीले जनाए अनुसार, बाढीबाट सिरहामा करिब ७५ हजार मानिस प्रभावित भएको तथ्यांक छ ।