आरक्षण बचाऔं आन्दोलन : भोलि देशैभर विरोधसभा र पुतला दहन, यस्तो आह्वान !

न्यूज ब्यूरो, काठमाडौं । लोकसेवा आयोगको विज्ञापन विरुद्ध जारी 'आरक्षण बचाऔं आन्दोलन' अन्तर्गत भोलि (शुक्रबार) संघीय मामिला तथा सामान्य प्रशासन मन्त्री लालबाबु पण्डित र लोकसेवा आयोगका अध्यक्ष उमेश मैनालीको पुतला दहनको तयारी गरिएको छ ।

लोकसेवा आयोगले समावेशीतालाई कुल्चेर विज्ञापन गरेको भन्दै विज्ञापन खारेजीको माग गर्दै जारी आन्दोलन अन्तर्गत भोलि ३ गते देशैभर विरोध सभाको आयोजन गरेर पुतला जलाइने तयारी गरिएको हो ।

असंवैधानिक तथा असमावेशी विज्ञापनको विरोधमा टिएमएनसी र अन्य पहिचानवादी संघ संगठनहरुको अगुवाईमा भइरहेको चरणबद्ध आन्दोलनलाई निरन्तरता दिँदै भोलि देशभर विरोध सभा तथा पुतला दहन गर्न लागेको टिएमएनसीका सदस्य काशिन्द्र यादवले जानकारी दिए ।

भोलिको कार्यक्रमको लागि समाजिक सञ्जाल मार्फत् प्रचारप्रसार तीव्र पारिएको छ । देशैभर विभिन्न जिल्लाको विभिन्न स्थानमा आयोजन हुने विरोध सभा तथा पुतला दहन कार्यक्रममा सहभागिताको लागि आन्दोलन समितिले सबैमा आह्वान गरेको छ ।

आन्दोलन समितिले जनाए अनुसार, यो कार्यक्रम सिरहा सदरमुकाम र पूर्वपश्चिम राजमार्गमा पर्ने गोलबजारमा समेत आयोजना हुनेछ ।