दुःखद : महोत्तरीको जलेश्वरमा नदी पार गर्न खोज्दा दुई बालक बगे !

न्यूज ब्यूरो, महोत्तरी । पानीको बहाब उच्च भएको बेला दुई बालकले नदी पार गर्न खोज्दा बेपत्ता भएका छन् ।

महोत्तरीको जलेश्वर नगरपालिका वडा नं. ८ स्थित नदीबाट तीव्र गतिमा बगिरहेको पानीमा पार गर्न खोज्दा बगेको जिल्ला प्रहरी कार्यालय महोत्तरीले जनाएको छ । बेपत्ता हुनेमा जलेश्वर नगरपालिका वडा नं. ८ बजराही बस्ने स्थानीय मनोज ठाकुरका १२ बर्षिय छोरा प्रशान्त ठाकुर र उनकै भान्जा युवराज ठाकुर रहेको छ । मामा गाउँ आएका युवराज मामा छोरासँगै बाहिर निस्केका थिए । तीव्र गतिमा चलिरहेको पानी भएर पार गर्न खोज्दा पानीले बगाएर लगेको हो ।

घटना भएलगत्तै केही बेरमा पुगेका प्रहरी र नेपाली सेनाको उद्धार टोलीले उनलाई उद्धार गर्न खोजेपनि अहिलेसम्म कुनै अत्तोपत्तो भने लागेको छैनन् । घटना दिउँसो २ बजेतर्फ नै भएको जिल्ला प्रहरी कार्यालय महोत्तरीले जनाएको छ । मनोजका भान्जा युवराज भने महोत्तरीकै पिपरा गाउँपालिकाको रहेको जनाइएको छ । युवराज पिपरा गाउँपालिका बस्ने स्थानीय विजय ठाकुरको छोरा रहेको बुझिएपनि यसको पुष्टि भने भएको छैनन् । विजय पेशाले सिएमए चिकित्सक हुन् ।

यता, दुई अबोध बालक बाढीमा बगेपनि प्रशासनले कुनै प्रकारकोे रेस्क्यू नगरेको आरोप लगाइएको छ । बालकहरु बाढीमा बग्दा नेपाली सेना र नेपाल प्रहरीको टोली केही बेरमै घटनास्थल पुगेपनि पानीको बहाबले गर्दा उद्धार गर्न नसकेको स्वीकार गरिएको हो ।

महोत्तरीका प्रहरी प्रमुख (एसपी) ले प्रहरीको तर्फबाट सकेसम्म प्रयास गरिएपनि बालकको शव अहिलेसम्म फेला पर्न सकेको छैनन् । पानीको बहाबले गर्दा खोजी कार्यमा कठिनाई भएको उनले बताए ।