कमलाले बगायो जनकपुर-जयनगर रेल्वे लीक

न्यूज ब्यूरो, जनकपुरधाम । कमला नदीमा आएको उच्च पानीको बहाबले छर्की तोडेका कमलाको पानीले रेल्वे लीक समेत बगाएका छन् ।

गत बुधबारदेखि नै निरन्तर रुपमा आएको अबिलर र मुसलेधार बर्षाका कारण धनुषा र सिरहा जिल्लाको सीमामा रहेको कमला नदीमा पानीको बहाब उच्च प्रवाह भईरहेको छ । पानीको सतह माथि भएपछि कमला नदी छेउमै रहेको एक गाउँको छर्की फोडेर गाउँ नै डुबाएका छन् । पूर्वी धनुषाको जनकनन्दनी गाउँपालिका वडा नं. १ इनरबा टोलमा कमलाको पानी पसेको छ भने त्यहीबाट लगाइएको रेल्वे लीक समेत बगाएका छन् ।

अहिले पनि कमला नदीमा पानीको बहाब उच्च नै रहेको जनाउँदै छर्की (भँगालो) फोडेर आएको पानीले जयनगर जनकपुर रेल्वे लीक उपर करिब ५ फिटसम्म पानी तीव्र रुपमा प्रवाह हुन थालेपछि केही दुरीमा लीक नै बगाएको जनाइएको छ । रेल्वेको करिब ६० देखि ७० मिटर सम्मको लिक टुटेको रेल्वे विभाग जनकपुरधामका साइट इन्जिनीयर बिनोद प्रसाद ओझाले जानकारी दिए । उनका अनुसार सो स्थानमा अहिलेसम्म पनि पानी जमेको छ ।

जनकनन्दनी गाउँपालिकामा करिब २ हजार घर परिवार विस्थापित भएका छन् । अहिले कमला नदीमा पानीको बहाब भने खतराको सतह भन्दा तलै रहेको छ । साँझ ५ बजेसम्म कमला नदीमा पानीको बहाब भने ३.३६ (एम) मापन गरिएको छ ।