निरन्तरको वर्षाले डुबानमा सिरहा, कमला आसपासका गाउँमा त्राहीमाम

न्यूज ब्यूरो, सिरहा । लगातारको वर्षाले सिरहाका कयौं गाउँ डुबानमा परेका छन् ।

अविरल वर्षापछि विभिन्न खोला तथा नदीहरुमा आएको बाढी गाउँ छिरेपछि सर्वसाधारणको जनजीवन अस्तव्यस्त बनेको छ ।

सिरहा–धनुषा सिमामा रहेको कमला नदीको बाढी त्यस आसपासका गाउँहरुमा पस्दा त्राहीमाम मचाएको छ भने सिरहा पूर्वी भेगका नदीको बाढी समेत बस्तीमा पस्दा जनजीवन त्रासमय भएको छ ।

लगातारको वर्षापछि कमला, बतहा, घुर्मी, गानन लगायतका ठूला खोलामा आएको बाढीको जलस्तर उच्च हुँदा पानी गाउँबस्तीमा पसेको हो । अन्य खोला नजिकका बस्तीमा त्यत्ति असर नपरेपनि मूख्य नदी कमला आसपासका बस्तीमा कहर मचेको छ ।

कमला छेउका केही बस्तीमा पानी घरसम्म पसेपछि अन्नपानी भिज्नुको साथै खाना बनाउने ठाउँसमेत नहुँदा यहाँका बासिन्दा झन् समस्यामा परेको देखिएको छ । कमला नदीमा बढ्दै गरेको जलस्तरले नदी छेउको बस्तीमा त्रास फैलिएको छ ।

निरन्तर रुपमा परिरहेको पानीका कारण सदरमुकाम सिरहासहित पूर्वपश्चिम् राजमार्गमा पर्ने मिर्चैया, चोहर्वा, गोलबजार, धनगढी तथा लहान लगायतका बजारहरु पनि डुबानमा परेका छन् । पानीको बढी गहिराईले तालमा परिणत भएको छ ।

बजारहरुमा पानी निकासका लागि नालाको उचित व्यवस्थापन नहुँदा पानी थुनिएर घरमा समेत पसको छ । नाला निर्माणका लागि करोडौं खर्चिएपनि अधुरै छोड्दा अलपत्र बनेका नालाहरु कामै नलाग्ने छन् भने रहेका नालाहरु पनि जाम भएर पानी निकास हुन सकिरहेको छैन ।

त्यसैगरी, जिल्लामा रहेका सरकारी अड्डाहरुमा पनि पानी पस्दा कामकाज गर्न समस्या भएको छ ।