महेन्द्रनगर-ढल्केवर सडकखण्ड पनि अबरुद्ध

न्यूज ब्यूरो, जनकपुरधाम । अबिरल बर्षाका कारण धनुषाको महेन्द्रनगर ढल्केबर सडकखण्ड पनि अवरुद्ध भएको छ ।

बुधबारदेखि नै परेको अबिरल बर्षाका कारण पानीको बहाब नदीहरुमा उच्च भएपछि राजमार्गमा पानी आएको हो । धनुषाको क्षीरेश्वरनाथ नगरपालिका वडा नं. ५ स्थित रहेको पूल नजिकै जनकपुर ढल्केवर सडकखण्डमा पानी चढेपछि सवारी आवागमन बन्द भएको छ । मध्यम खाले सवारीको आवागमन भएपनि कार, मारुती जस्ता सानो पाँग्रे खालको सवारी भने जकथक परेको हो ।

क्षीरेश्वरनाथ नगरपालिका र मिथिला नगरपालिकाको सीमामै बाढी सडक उपर आउँदा सवारी साधान आवागमन अवरुद्ध भएको हो । खेतका पानी तथा नाला निकासको व्यवस्था नभएको कारण पानी जमेर सडकमा आएको हो । बाढीका कारण त्यो सडकखण्डको आधी भाग बगाएर लगेको छ भने आधीबाट सर्वसाधारणहरु पैदल आवागमन मात्र गरिरहेका छन् ।

उक्त सडकखण्डमा पानी चढेपछि जनकपुरबाट चल्ने छोटो तथा लामो दुरीका सवारी साधनहरु भने चल्न सकेको छैनन् ।