कर्जन्हा केन्द्र विवाद : अदालतको आदेश वेवास्ता, ७ दिने अल्टिमेटम !

न्यूज ब्यूरो, सिरहा । लामो समयदेखि केन्द्र विवाद चल्दै आएको सिरहाको कर्जन्हा नगरपालिकाको कार्यालय अदालतले आदेश गरेको स्थानमा संचालन नभएपछि नगरका नागरिक समाज तथा युवाहरु एक्सनमा उत्रिएका छन् ।

उच्च अदालत राजविराजले गरेको आदेशलाई नगरपालिकाले वेवास्ता गरेर कार्यालय संचालन गरेपछि स्वतन्त्र युवाहरुको समूह युवा जागरण अभियानमा आवद्ध नगरका युवाहरुले हाल नगरपालिकाको कार्यालय संचालन रहेको कार्यालय (कर्जन्हा) मा निवेदन दर्ता गराएका हुन् ।

अदालतले आदेश गरेको स्थानमा कार्यालय संचालन गर्न युवाहरुले सात दिनको अल्टिमेटम दिएका छन् । अदालतले नगरपालिकाको कार्यालय राजपत्रमा प्रकाशित गरिएको साविकको कर्जन्हा गाविसको कार्यालय बगहामा संचालन गर्न आदेश गरेको थियो ।

तर, नगरपालिकाले अदालतको आदेश अटेरी गरेपछि युवाहरुले अदालतको आदेश बमोजिम बगहामा कार्यालय संचालनको मागसहित निवेदन दर्ता गराएका छन् । उच्च अदालत राजविराजले गत वैशाख २९ रिट उपर सुनुवाई गर्दै २०७४ साल २ महिना ११ गतेको राजपत्रमा प्रकाशित ‘कर्जन्हा नगरपालिकाको कार्यालय साविकको कर्जन्हा गाविसको कार्यालयमा संचालन हुने’ आदेशलाई सदर गर्दै सो स्थानमा कार्यालय संचालन गर्न गरेको फैसला बमोजिम बगहामा कार्यालय संचालन भइरहेको छैन ।

एक पक्षको राजपत्रमा उल्लेख गरिएको स्थानमा कार्यालय संचालन हुनुपर्ने र अर्को पक्षको कर्जन्हामा संचालन हुनुपर्ने अडानसहित परेको रिट उपर उच्च अदालत राजविराजले राजपत्रमा उल्लेख गरिएकै स्थानमा संचालन गर्न आदेश गरेको हो ।

अदालतले यस्तो आदेश गरेपछि साविकको कर्जन्हा गाविसको कार्यालय बगहामा नगरपालिकाको बोर्ड मात्र झुण्ड्याइएको छ भने नगर कार्यपालिकाको कार्यालय कर्जन्हाबाटै संचालन भइरहेको निवेदनमा उल्लेख गरिएको छ ।

नगरपालिकाको बोर्ड बगहामा लगाइएको र कामको लागि सेवाग्राहीले कर्जन्हा धाउनुुपरेको भन्दै यसको यथाशिघ्र समाधानका लागि आग्रह गरिएको छ । केन्द्र विवादका कारण सर्वसाधारण अन्यौलमा परेको र विकास निर्माणका कामले समेत गति लिन नसकेको भन्दै अदालतको आदेश मानेर नगरको भलाईका लागि अगाडि बढ्न अनुरोध गरेको समूहका संयोजक प्रभात महतोले जानकारी दिए ।

सात दिनभित्र नगरपालिकाबाट जवाफ नपाइए र निवेदनलाई वेवास्ता गरिए अर्को कदम चाल्न बाध्य हुने चेतावनी निवेदन मार्फत् दिइएको छ ।