जनकपुर–जयनगर रेल असोजबाट गुड्ने पक्का !

न्यूज ब्यूरो, जनकपुरधाम । जयनगर–जनकपुर–कुर्था रेल्वे सेवा अगामी असोजबाट संचालनमा आउने पक्का भएको छ । बहुप्रतिक्षित जयनगर–जनकपुर–कुर्था रेल संचालनका लागि अन्तिम तयारी पूरा गरिएको हो ।

लामो समयदेखि रेल संचालनको लागि तयारी भइरहेपनि हालसम्म संचालन हुन सकेको छैन । तर, अबको अगामी असोजबाट रेल गुड्ने पक्का भएको रेल विभागले जनाएको छ ।

रेल खरिद प्रक्रियामा समय लागेकाले संचालनमा ढिलो भएको जनाइएको छ । रेल विभागका अनुसार खरिद सम्झौता अनुसार तीन महिनाभित्र भारतबाट रेल आइपुग्नेछ ।

विभागका महाप्रकन्धक वलराम मिश्रका अनुसार दुई आधुनिक रेल खरिद गर्न विभागले भारतको कोनकोन रेल्वे करपोरेसनसँग ५८ करोड रुपैयामा सम्झौता गरेको छ । सम्झौता अनुसार तीन महिनाभित्रमै रेल आइपुग्ने र लगत्तै संचालयन गरिने तयारी गरिसकेको उनले बताए ।

संचालन हुन लागेको रूटमा चल्ने रेल आधुनिक हुने रेल विभागले जनाएको छ ।