नेकपा सरकारले देशलाई भ्रष्टाचारको अखाडा बनायो : नेता प्रसैला

न्यूज ब्यूरो, जनकपुरधाम । नेपाली कांग्रेसका नेता एवं पुर्व संसद दिनेश प्रसाद प्रसैला यादवले वर्तमान सरकारले देशलाई भ्रष्टाचारको अखाडा बनाएको आरोप लगाएका छन् ।

सहिदनगर नगरपालिका वडा नं. ८ स्थित गोठकैलपुरमा नेपाली कांग्रेसले देश भरि संचालन गरेको राष्ट्रिय जागरण अभियान सभालाई सम्बोधन गर्दै उनले जनताबाट पाएको दुई तिहाइ मतको दुरुपयोग गर्दै इतिहासकै शक्तिशाली कहलाउने सरकार काण्डै काण्डमा लिप्त भएको बताए ।

३३ किलो सुन काण्ड,वाईडबडि काण्ड र निर्मला हत्या काण्डमा संग्लन रहेको दोषी अहिलेसम्म सार्बजनिक नभएकाले सरकार माथि शंका लाग्नु स्वभाविक भएको बताए ।

लोकतान्त्रिक प्रक्रियामाबाट गठन भएको सरकार लोकतन्त्रको मुल्य मान्यतालाई खिल्ली उडाएरहेको छ । लोकतन्त्रमा प्रेस राज्यको चौथो अंग हुन्छ तर अहिले प्रेस जगतलाई कुण्ठित पार्ने गरि संसदमा मिडिया काउन्सिल विधेयक दर्ता भएको छ । के पत्रकारले भ्रष्टाचारको बारेमा समाचार लेख्नै नपाउने यो कस्तो प्रेस स्वतन्त्रताको पक्षपाती सरकार हो ? उनले प्रश्न गरे ।

वर्तमान सरकार प्रेसलाई सत्यतथ्य लेख्नबाट बन्चित गर्दै प्रेस लाई आफ्ना निति एवं कार्यक्रमलाई प्रचारप्रसार गर्ने प्रचारक बनाउन खोजेको आरोप लगाउँदै उनले नेपाली कांग्रेस जस्तो लोकतान्त्रिक पार्टी प्रतिपक्षमा रहुनजेल यस्ता लोकतन्त्र बिरोधि गतिविधि सफल हुन् नदिने विश्वास व्यक्त गरे ।

संसदीय व्यवस्थामा सदन बिचार बिमर्श र छलफल गर्ने थलो रहेको बताउँदै दुर्भाग्यवंश अहिले सदनमा प्रतिपक्षी दल सँग कुनै छलफल नगरी बहुमतको आडमा धमाधम निर्णय गरिरहेको आरोप लगाए । अब कांग्रेस मुख दर्शक भएर नबस्ने तथा सदन देखि सडक तताउने चेतावनी समेत दिएका छन् ।

चुनावको बेला मधेस केन्द्रित दलले मधेसीको अधिकार,सम्मान, पहिचान र जसको विरुद्धमा मधेसी जनताको भोट सोहरेका थिए तर अहिले मधेसी दल उनकै चरणमा समर्पण भएको आरोप लगाए । मधेसी दल केपी ओलीको सरकारमा सहभागी भए पनि संविधान संसोधन नहुने ठोकुवा गरे । विगतमा पनि नेपाली कांग्रेसकै नेतृत्वमा संविधान संसोधन भएका हुन् फेरि पनि संविधान संसोधनका कांग्रेसकै नेतृत्व सम्भव हुने बताएका छन् ।

प्रमुख प्रतिपक्षी दल नेपाली कांग्रेसले बैशाख २५ गते देखि मुलुकभर एकसाथ ‘हिमाल, पहाड, तराई मधेश राष्ट्रिय जागरण अभियानमा धनुषा निर्वाचन क्षेत्र ख का प्रदेश सभा संसदका प्रत्याशी राजदेब यादव,क्षेत्री सभापति राजकिशोर सिंह उपसभापति नवीन गोइहवार,नेपाली कांग्रेस तर्फबाट सहिद नगरपालिकाका मेयरका प्रत्याशी देबेन्द्र भ्रखेर,उपमेयर प्रत्याशी सुनिता सिंह लगायतका नेता तथा कार्यकर्ताको उपस्तिथि रहेको थियो ।

तीन चरणमा हुने अभियानको प्रथम चरण वैशाख २५ गते प्रारम्भ भइ आगामी जेठ २५ गते समापन हुनेछ।