धनुषाको गणेशमान चारनाथ नगरकी छात्रालाई शैक्षिक सामाग्री !

न्यूज ब्यूरो, जनकपुरधाम । धनुषाको गणेशमान चारनाथ नगरपालिकामा नगरभरकी छात्राहरुलाई शैक्षिक सामाग्री प्रदान गरिएको छ ।

गणेशमान चारनाथ नगरपालिकाद्धारा विरेन्द्र बजारस्थित कविर कुट्टीमा आयोजित बालबालिकाको अधिकारको लागि तालिम तथा शैक्षिक सामाग्री वितरण कार्यक्रममा सामुदायिक विद्यालयमा अध्ययनरत छात्राहरुलाई शैक्षिक सामाग्री वितरण गरिएको हो ।

नगरपालिकाकी उपमेयर मिनादेवी यादवले शैक्षिक सामाग्री हस्तान्तरण गरेकी हुन् । छात्राहरुलाई प्रोत्सान तथा शिक्षाप्रति आकर्षित गराउन शैक्षिक सामाग्री वितरण गरिएको हो ।

उपप्रमुख यादवले छात्राहरुको हौसला बुलन्द गर्न आगामी दिनमा अझ प्रभावकारी कार्यक्रम ल्याउने प्रतिवद्धता गरिन् । उनले महिलाको विकास विना राष्ट्रको विकास असम्भव रहेको भन्दै महिलालाई विशेष प्राथमिकतामा राखेर अगाडी बढ्नु अहिलेको प्रमुख आवश्यकता रहेको औल्याइन् ।

उनले नगर भित्र रहेको सामुदायिक विद्यालयहरुको शैक्षिक गुणस्तर सुधारमा चनाखो हुन शिक्षकहरुलाई आग्रह समेत गरिन् । शिक्षा क्षेत्रमा आफूले हरेक तवरबाट सहयोग गर्न तत्पर रहेको जनाइन् ।

दायाराम यादवको अध्यक्षतामा भएको कार्यक्रममा प्रमुख अतिथिको रुपमा नगर उपप्रमुख यादव थिइन् भने विशिष्ट अतिथिको रुपमा लेखा अधिकृत शिव नारायण साह, रामदुलार यादव लगायत विद्यालयका प्रधानध्यापक, शिक्षक, विद्यार्थीहरुको उल्लेख्य सहभागिता थियो ।