नगरकी महिलालाई बालविवाह र दाईजोविरुद्ध खुलेर बोल्नसक्ने बनाउँदैछौं : मेयर यादव

न्यूज ब्यूरो, सिरहा । मिर्चैया नगरपालिकाका मेयर श्रवण यादवले नगरकी महिला तथा किशोरीलाई बालविवाह र दाईजो प्रथाविरुद्ध खुलेर बोल्नसक्ने बनाइरहेको बताएका छन् ।

सिरहाको मिर्चैया कटारी चोकस्थित एभरेस्ट होटेलमा शुक्रवारदेखि सञ्चालन भएको बालविवाह तथा दाईजो प्रथा विरुद्धको तीनदिने तालिमलाई उद्घाटन गर्दै मेयर यादवले बालविवाह तथा दाईजो प्रथा लगायतका समाजिक कुरीतिलाई प्रास्त गर्न नगरकी महिलाहरुलाई खुलेरै बोल्नसक्ने बनाउन लागिपरेको बताएका हुन् ।

समाजिक संस्था समाज विकास नेपाल सिरहाको आयोजना तथा मिर्चैया नगरपालिकाको सहयोगमा सुरु भएको तीन दिने तालिममा उनले नगरको विकासका लागि महिलाको विकास आवश्यक रहेको औल्याए । उनले महिलाको विकास विना समृद्धि असम्भव रहेको भन्दै महिलालाई नगरपालिकाले विशेष प्राथमिकतामा राखेर अगाडि बढेको जनाए ।

नगरप्रमुख यादवले आगामी कार्ययोजनामा महिला उपर हुने अन्याय (बालविवाह, दहेज प्रथा) तथा समाजिक कुप्रथा र कुरीति अन्त्यका लागि विशेष कार्यक्रम ल्याउने प्रतिवद्धता गरे ।

उनले बालविवाहपछि किशोर अवस्थामै घर व्यवहारको जिम्मेवारीको बोझले किशोर किशोरीहरुको पठनपाठन अवरुद्ध हुने, किशोर अवस्थामै आमा बनेपछि महिलाको शरीर नाजुक हुने, महिलालाई दाईजोको कारण घरेलु हिंसा हुने, यातना दिने र मार्नेसम्मका घटना तराईमा अत्यधिक हुने गरेकाले यसविरुद्धको कदम आवश्यक रहेको औल्याउँदै नगरपालिकाले यसलाई विशेष प्राथमिकतामा राखेको जनाए ।

समाज विकास नेपालकी अध्यक्ष कविता खपाङ्गीको अध्यक्षता एवं नगर प्रमुख यादवको प्रमुख आतिथ्यमा उद्घाटन गरिएको ३ दिने तालिममा १०० बढी महिलाहरु सहभागी छिन् । मेयर यादवले तालिममा सिकेका कुराहरुलाई व्यवहारमा उतार्न सहभागीहरुलाई आग्रह समेत गरे ।

तालिममा नगरपालिकाको १२ वटै वडाबाट महिलाहरुलाई सहभागी गराइएको छ । तालिम समुद्घाटन समारोहमा नगरप्रमुख यादव, उपप्रमुख जीवछी देवी साह, नेपाल प्रहरीकी कविता अधिकारी, वडा ६ का वडाध्यक्ष देवकृष्ण साह लगायतको उल्लेख्य उपस्थिति थियो ।