जनकपुरको जानकी मन्दिर क्षेत्रमा भोली मानव साँगलो बनाईने

न्यूज ब्यूरो, जनकपुरधाम । जनकपुरको जानकी मन्दिर क्षेत्रमा बुधबार मानव साँगलो बनाइने भएको छ ।

एकताकोे सन्देश दिन गणतन्त्र दिवसको अवसर पारेर बुधबार विहान जानकी मन्दिर क्षेत्रमा मानव सांग्लो बनाउने कार्यक्रम मुख्यमन्त्री तथा मन्त्रीपरिषदको कार्यालयले कार्यक्रम तय गरेको हो । यसका साथै प्रभात फेरी, बेलुका दिप प्रज्वलन र बिहिबार विहान चियापान कार्यक्रम गरिने मुख्यमन्त्री तथा मन्त्रिपरिषदको कार्यालयका सचिव दीपक सुवेदीले जानकारी दिए ।

प्रदेश नम्बर २ को मुख्यमन्त्री तथा मन्त्रिपरिषदको कार्यालयले भव्यतापूर्वक गणतन्त्र दिवस मनाउनको लागि यी कार्यक्रहरुका साथै एकताको संदेश जाओस भन्ने उदेश्यले मानव साँगलो निर्माण गर्ने कार्यक्रम तय गरिएको छ । मानव साँगलोमा प्रदेश नं. २ का कर्मचारी सहित राजनीतिक दलका प्रतिनीधि लगायत आम सर्वसाधारणहरुलाई समेत मानव साँगलोमा सहभागी हुन अनुरोध गरिएको छ ।

मँगलबार मुख्यमन्त्री तथा मन्त्रिपरिषदको कार्यालयमा बसेको सर्वपक्षीय वैठकबाट गणतन्त्र दिवसको अवसरमा दुई दिनसम्म विशेष कार्यक्रम गर्ने निर्णय गरिएको छ ।

वैठकमा सुरक्षानिकायका प्रमुखहरु, जनकपुरधाम उपमहानगरपालिकाका प्रतिनिधि, प्रमुख जिल्ला अधिकारी, जिल्ला समन्वय समिति धनुषाका प्रतिनिधि, नेपाल पत्रकार महासंघका प्रतिनिधि, बाल क्लबका प्रतिनिधि लगायतकाहरुको उपस्थिति रहेको थियो ।