जनकपुर एयरपोर्टबाट रात्रीकालीन हवाई उडान सुरु !

न्यूज ब्यूरो, जनकपुरधाम । जनकपुरधाम विमानस्थलबाट रात्रीकालीन हवाई उडान सुरु गरिएको छ । हवाई यात्रुहरुको सहजताको लागि विमास्थलबाट आईतवारदेखि विधिवत् रुपमा रात्रीकालीन उडान भर्न सुरु गरिएको हो ।

रात्रीकालीन उडानका लागि झण्डै १० करोडको लागतमा ‘एयर फिल्डग्राउण्ड लाइटिङ्ग सिस्टम’ जडान गरिएको छ । सो लाइटिङ्ग सिस्टम जडान गरिएपछि रात्रिकालीन उडान सुरु भएको छ ।

पहिलो दिन बुद्ध एयरको ९ एन–ए जे एक्स विमानले जनकपुरबाट काठमाण्डौका लागि सफल परीक्षण उडान गरेको हो । अब यात्रुहरुले रात्री सेवा पनि पाउने भएपछि सहज हुने नेपाल नागरिक उड्डयन कार्यालय जनकपुरधामका प्रमुख सन्तोष ढकालले विश्वास लिए ।

जनकपुरबाट रात्रीकालीन उडान सुरु भएसँगै सहजै यहाँबाट बाहिर ओहोरदोहोर गर्न सजिलो भएको छ । यात्रुहरुले अब रात्री हवाई सेवा सहजै पाउने छन् ।

जनकपुरधाम विमानस्थलबाट अहिले यति र बुद्ध एयरलाइन्सले उडान गर्दै आएका छन् ।