जल्न थाल्यो जनकपुर, झडपपछि एक घाईते !

न्यूज ब्यूरो, जनकपुरधाम । व्यापारी उपर हातपात गरेको भन्दै व्यापारीहरुले जनकपुरमा प्रदर्शन गरेपछि अवस्था तनावग्रस्त बनेको छ ।

जनकपुर उपमहानगरपालिकाकी उपमेयर रिता मिश्रा सँगै रहेको एक वडाध्यक्षले एक व्यापारी उपर हातपात गरेको भन्दै व्यापारीहरु जनकपुरधाम उपमहानगरपालिकाको कार्यालय अगाडी टायर बालेर प्रदर्शन गरिरहेका छन् । नगरकी उपमेयर मिश्रासँगे रहेका जनकपुरधाम उपमहानगरपालिका वडा नं. ७ का वडाध्यक्ष जानकी राम साहले ग्रीन टेलर्सका मास्टर मोहम्मद असलमलाई हातपात गरेको भन्दै अवस्था तनावग्रस्त बनेको हो ।

नगरपालिकाको गेटमा टेलर्स मास्टरले फोहोर फालेपछि उमेयर मिश्रा र वडाध्यक्ष साहले उनलाई झपारेको बताईएको छ । झपारे लगत्तै भनाभन विवादको रुप लिएपछि वडाध्यक्ष साहले मास्टर असलमलाई हातपात गरे । हातपातपछि आक्रोसित स्थानीय व्यापारीहरुले नगरपालिकाकी उपमेयर र वडाध्यक्ष साह विरुद्ध नारावाजी गर्न थालेपछि अवस्था तनावग्रस्त बनेको हो ।

यता उपमहानगर कार्यालयले भने सरसफाइको विषयलाई लिएर उपमेयर रीता मिश्र सम्झाउन जाँदा उनीमाथि ग्रिन टेलरका मास्टरले अपशब्द बोलेपछि उपमेयरसँगै रहेका वडाध्यक्ष साहले धक्का दिएको मात्रै भनी बताएका थिए। त्यसपछि घटनाले उग्ररुप लिएको बताइएको छ ।

सिलाई कटाइ गर्ने मास्टरहरुले अहिले जनकपुरको उपमहानगर कार्यालय अगाडि टायर बालेर प्रदर्शन गरेका छन्। अहिले नगरपालिका कार्यालय परिसर तनावग्रस्त बनेको छ।

घटना भएलगत्तै समयमै पुगेका जिल्ला प्रहरी कार्यालय धनुषाको टोली सहित वडा प्रहरी कार्यालयका टोलीले स्थिति नियन्त्रणमा लिने प्रयास गरेपनि विवाद झन बढेको बताइएको छ । ग्रीन टेलर्सकै एक अन्य कर्मचारीलाई प्रहरीले नियन्त्रणमा लिएपनि वडाध्यक्ष र उपमेयर समर्थकहरुले उनलाई निर्घात कुटपिट गरी घाईते बनाएको जनाइएको छ ।

आन्दोलनमा उत्रेका व्यापारीहरुले उपमेयर मिश्रा र वडाध्यक्ष साहलाई पक्राउ गरी कारवाही गर्नुपर्ने माग राखेका छन भने जनकपुर उद्योग वाणिज्य संघका अध्यक्ष ललित साहले घटनाप्रति दुःख जनाउँदै दोषीलाई छानबिन गरी कारवाही गर्नुपर्ने प्रतिक्रिया दिएका छन् ।

केही दिनदेखि जनकपुर नगरका सफाई कर्मचारीहरुले आन्दोलन गरिरहेका छन जसको कारण नगरको फोहोर उठन सकेको छैनन् । अहिले नगरपालिका कार्यालय परिसर तनावग्रस्त बनेको छ। यस सम्बन्धमा उपमेयर झा र वडाध्यक्ष साह सँग सम्पर्क गर्दा सम्पर्क हुन सकेनन् ।