हावाहुरी अपडेट : 'भौतिक क्षति बाहेक हावाहुरीले कसैको मृत्यू भएको छैन' !

न्यूज ब्यूरो, जनकपुरधाम । आईतबार (आज) एकाविहानै आएको हावाहुरीबाट धनुषामा मानवीय क्षति नभएको धनुषा प्रहरीले पुष्टि गरेको छ ।

हावाहुरीका कारण दुईजनाको मृत्यू भएको खबर सामाजिक सँजाल आएपछि धनुषा प्रहरीले हुरीमा परी कसैको पनि मृत्यू नभएको र बिरामीका कारण दुईजनाको मृत्यू भएको जनाएको छ ।

धनुषाको नगराईन नगरपालिका ५ का ६० वर्षीय रामपती मुखिया र ६५ वर्षीय महाविर दास तात्मको बिरामीको कारण मृत्यू भएको हो । हावाहुरीबाट कुनै किसिमको मानवीय क्षति नभएको जनाउँदै न्यूज ब्यूरोसँग धनुषाका डिएसपी रामेश्वर कार्कीले भने, -"हावाहुरीबाट कसैको पनि मृत्यू भएको छैन, त्यो एकदम फेक हो, उनीहरु पहिलेदेखि नै बिरामी थिए, बिरामीकै कारण दुबैजनाको मृत्यू भएको हो ।"

उनीहरूको दाहसंस्कारका लागि पनि लगिसकेको डिएसपी कार्कीले जनाए । प्रदेश २ को बारा पर्सामा गत चैतमा गएको विनाशकारी टोर्नाडो झैँ आज विहान धनुषामा पनि आएको हुरीले भौतिक क्षति भने धेरै ठाउँमा पुर्याएको छ । उनले भने - "हावाहुरीको कारण दुई जनाको मृत्यू भएको खवर विल्कुल गलत हो, उनीहरु एक जना मानसिक रोगको औषधी खाईरहेका थिए , उनीहरुको कालगतिले मृत्यू भएको छ , अन्य केही छैन ।"

भारी हुरीका कारण कयौं घरका छानाहरु उडाएको छ भने कयौं ठाउँमा रुख र पोलहरु पनि ढालेको छ । आज विहान आएको ठूलो आँधीले मानवीय क्षतिको अनुमान गरिएपनि क्षति हुनबाट जोगिएको छ । भौतिक संरचनाहरुमा भने ठूलो क्षति पुगेको छ ।

गत चैत्तमा हावाहुरीकै कारण प्रदेश नं. २ को बारामा २८ जनाको मृत्यू भएको थियो ।