सर्वोच्चको आदेशविरुद्ध जनकपुरमा प्रदर्शन, अदालतको आदेशपत्र जलायो !

न्यूज ब्यूरो, जनकपुरधाम । सर्वोच्च अदालतले जन्मसिद्ध नेपालीका सन्तानलाई वंशजको नागरिकता नदिन गरेको आदेशको संघीय समाजवादी विद्यार्थी फोरम नेपालले विरोध गरेको छ ।

अदालतको निर्णय मधेसविरोधी भएको भन्दै विद्यार्थी फोरमले सर्वोच्चले वंशजको नागरिकता जारी नगर्न गृह मन्त्रालयको नाममा जारी गरेको आदेशको प्रतिलिपि जलाएको छ।सर्वोच्चको आदेश विरोधमा मंगलबार साझ जनकपुरको भानुचोकमा विद्यार्थी फोरम,युवा नेताहरुको सहभागितामा प्रदर्शन समेत गरेको छ।

विद्यार्थी फोरम प्रदेश नं।२ को उपाध्यक्ष बिकाश यादवको नेतृत्वमा रहेको विद्यार्थी , युवाले जनकपुरको भानुचोकमा सर्वोच्च अदालतको निर्णयविरुद्ध प्रदर्शन गरेका थिए। प्रदर्शनका क्रममा विद्यार्थीहरूले सर्वोच्च अदालतको निर्णय तत्काल सच्याउन माग गरेका छन् ।

प्रदेश नं.२ का उपाध्यक्ष बिकाश यादवले नेपालको कानुन बुझी नसक्नु भएको प्रतिक्रिया दिएका छन्। उनले सर्वोच्च अदालतकै निर्णयबाट जन्मसिद्ध नेपालीका सन्तानलाई वंशजका आधारमा जिल्ला प्रशासनले नागरिकता वितरण गरिरहेका बेला फेरि उसले नै कार्यान्वयन नगर्न जारी गरेको आदेशबाट सर्वोच्च अदालतको दोहोरो चरित्र प्रष्ट भएको आरोप लगाए |

०६३ मा जन्मका आधारमा नागरिकता लिएका नेपालीका सन्तानलाई वंशजकै आधारमा नागरिकता वितरण गर्नु भनी संविधानमै लेखिए पनि मधेसविरोधी मानसिकता बोकेका केही अधिवक्ताले मधेसी युवालाई नागरिकताविहीन बनाउने र देशमा द्वन्द्व बिजारोपण गर्न खोजेको प्रदेश नं.२ का विद्यार्थी फोरम उपाध्यक्ष यादवले आरोप लगाए ।

विरोध प्रदर्शनमा संघीय समाजवादी फोरम नेपाल धनुषाको युवा नेताहरु बिनोद रोहिता , नवीन यादव , समाजवादी युवा फोरम धनुषाका संयोजक दिपेन्द्र कापरी , धिरु यादव , बलिराम कापरी,संजय यादव लगायत संघीय समाजवादी फोरम नेपालका नेता तथा कार्यकर्ता सहभागी थिए ।