बारा–पर्सा घटना : ३० गते शोक मनाउन मधेश सरकारको आह्वान !

न्यूज ब्यूरो, जनकपुरधाम । प्रदेश २ को बारा–पर्सामा आएको विनाशकारी आँधीमा परी ज्यान गुमाएकाहरुको आत्माको चिर शान्तिको कामनाको लागि प्रदेश २ सरकारले प्रादेशिक शोक मनाउने भएको छ । आज बसेको प्रदेश २ को मुख्यमन्त्री तथा मन्त्री परिषद्को बैठकले ज्यान गुमाएकाहरुको १३ औँ पुण्य तिथिमा शोक मनाउने निर्णय गरेको हो ।

प्रदेश २ सरकारले १३ औँ पुण्य तिथिको दिन चैत्र ३० गते शोक मनाउने निर्णय गर्दै उक्त दिन विहान ११ बजे दुई मिनेट मौन धारण गर्न आह्वान समेत गरेको छ ।

आँधीमा परी ज्यान गुमाएका प्रत्येक मृतकको परिवारलाई किरिया खर्चवापत तत्काल २५ हजार रुपैयाँ उपलब्ध गराउने निर्णय पनि गरिएको छ ।

मधेशमा भएको अपूर्णीय घटनामा प्रदेश २ सरकारले संघीय सरकारलाई राष्ट्रिय शोकको घोषणा गर्न आग्रह गरेपनि सरकारले नगरेपछि प्रदेश २ सरकारले प्रादेशिक शोक घोषणा गरेको हो । संघीय सरकारले राष्ट्रिय शोक घोषणा नगरेका कारण चौतर्फी आलोचना समेत भएको छ ।

गत १७ गते राती आएको विनाशकारी आँधीका कारण बारा–पर्सामा २८ जनाको ज्यान गएको थियो भने ६ बढी सर्वसधारण घाईते छन् ।