यी हुन् एसईईको प्रश्नपत्र 'आउट' गर्ने शिक्षक र प्रहरीसहित ६ जना !

न्यूज ब्यूरो, जनकपुरधाम । प्रदेश २ मा एसईई परीक्षाको प्रश्नपत्र आउट गर्ने ६ जनालाई केन्द्रीय अनुसन्धान ब्युरो (सीआईबी) ले सार्वजनिक गरेको छ । विज्ञान र सामाजिक शिक्षा गरी दुई विषयका प्रश्नपत्र परीक्षा हुनुअगावै सार्वजनिक गरेको आरोपमा पक्राउ गरिएका १ शिक्षकसहित ६ जनालाई सीआईबीले आज (बिहिवार) सप्तरीमा पत्रकार सम्मेलन गरेर सार्वजनिक गरेको हो ।

प्रश्नपत्र आउट प्रकरणमा स्थानीय प्रहरीको सहयोगमा सीआएईबीले गरेको अनुसन्धानमा सप्तरी राजविराजका मनोज यादव, विष्णुदेव यादव, राजेश यादव, उमेश यादव, ब्रह्मदेव सुनरइत र दीपेन्द्र कुमार मण्डलले प्रश्नपत्र आउट गरेको अनुसन्धानमाबाट खुलेको छ । आरोपीमध्ये मनोज शिक्षक हुन् भने ब्रह्मदेव र दीपेन्द्र कुमार प्रहरी जवान हुन् ।

प्रश्नपत्र आउट काण्डमा पक्राउपछि उनीहरुमाथि कारबाही सुरु भएको प्रहरीले जानकारी दिएको छ ।

गत चैत १४ गतेको विज्ञान र १५ गतेको सामाजिक विषयको प्रश्नपत्र परीक्षा सुरु हुनुअगावै उनीहरुले विभिन्न सामाजिक सञ्जालमार्फत आउट गरेका थिए । प्रश्नपत्र आउट भएसँगै प्रदेश २ को एसईईका सम्पूर्ण परीक्षा रद्द गरिएको थियो ।

परीक्षा नै रद्द तथा स्थगित गरिएपछि आक्रोशित विद्यार्थीहरुले जोडतोडले आन्दोलन चर्काएका थिए । स्थगित गरिएका परीक्षा चैत्त २२ गतेदेखि सँचालन हुने मिति तय गरिएको छ ।