सिरहामा विज्ञान विषयको प्रश्नपत्र आउट, ५ निरीक्षक निकालिए !

न्यूज ब्यूरो, सिरहा । सिरहामा विज्ञान विषयको प्रश्नपत्र परीक्षा अगाबै बाहिरिएको खुलासा भएको छ । यसपालीको एसईई परीक्षा विगतको तुलनामा हदैसम्मको अमर्यादित चलिरहेको व्यापक आवाजहरु उठिरहेका बेला सिरहामा परीक्षा गार्डले नै प्रश्नपत्र आउट गरेको बुझिएको छ ।

राति २ बजेतिर नै समाजिक सँजाल फेसबूकबाट प्रश्नपत्र लिक गरिएको बताइएको छ । परीक्षा मर्यादित बनाउन खटाइएका गार्ड (निरीक्षक) ले नै मोबाईलबाट प्रश्नपत्र आउट गरेको बुझिएको छ ।

परीक्षामा व्यापक रुपमा बाहिरबाट फ्ल्याप गइरहेको देखिएपछि तथा विद्यार्थीले भित्र फ्ल्यापबाट सारिरहेको बाहिर आएपछि प्रश्नपत्र आउट भएको खुलासा भएको हो । तर, कसले प्रश्नपत्र आउट गर्यो र कहाँबाट भयो भन्नेबारे आधिकारिक पुष्टि भने हुन सकेको छैन ।

प्रमुख जिल्ला रुद्रप्रसाद पण्डितसँग यस विषयमा प्रतिक्रिया लिँदा उनले सिरहाबाट प्रश्नपत्र आउट नभएको दावी गरे । उनले न्यूज ब्यूरोसँग भने, ‘प्रदेश २ को अरु जिल्लबाट प्रश्नपत्र आउट भएको हो वा होईन त्यो थाहा भएन । तर, सिरहाबाट भएको छैन । आधिकारिक प्रमाण छ भने दिनुस्, हामी कारवाही थाल्छौं ।’

सिरहाबाट प्रश्नपत्र आउट भएको हल्ला चलेपनि प्रमाणित हुन नसकेको र सिरहाको कुनै केन्द्रबाट आउट नभएको जिल्ला शिक्षा समन्वय इकाई प्रमुख दोलराज पाण्डेले बताए ।

यस्तै, अनुगमनको क्रममा परीक्षामा अमर्यादित गतिविधि गरेको सिरहाको पशुपति माविबाट ५ जना गार्डलाई निष्काशित गरिएको प्रजिअ पण्डितले जानकारी गराए ।

बुधवार सिरहाको विभिन्न परीक्षा केन्द्रबाट १२ जना विद्यार्थीसहित २ जना गार्डलाई निष्काशित गरिएको थियो ।