दुर्गा भगवतीले बाडे  २५३ जना छात्राहरुलाई साइकल

न्यूज ब्यूरो, रौतहट । “बेटी पढाउ, बेटी बचाऊ” अभियान अन्तर्गत दुर्गा भगवती गाउँपालिकाले कक्षा ८ र ९ मा अध्ययनरत २५३ जना छात्राहरुलाई सोमवार एक समारोहका विच साइकल उपहार प्रदान गरेका छन् ।

रौतहटको संसदीय क्षेत्र नम्वर १ अन्तर्गत पर्ने दुर्गा भगवती गाउँपालिकामा रहेका सरस्वती माध्यमिक विद्यालय पिपराभलोहिया, संस्कृत माध्यमिक विद्यालय मत्सरी र अधारभुत विद्यालय पचरुखीमा कक्षा ८ र ९ मा अध्ययनरत २५३ जना छात्राहरुलाई साइकल उपहार प्रदान गरिएका हुन् ।

प्रदेश नम्वर २ का सरकारले “बेटी पढाउ, बेटी बचाऊ” अभियान अन्तर्गत साधनश्रोतको अभावमा कोहीपनि छात्राहरु विद्यालयको अध्यापन गर्नबाट बंचित नहुन भने उद्देश्यबाट आज दुर्गा भगवती गाउँपालिकाका चालु आर्थिक बर्षको बजेटबाट सामुदायिक विद्यालयमा अध्ययन गर्ने छात्राहरुलाई साइकल वितरण गरिएका छन् ।

साइकल वितरण गर्दै जिल्ला समन्वय समितिका सभापति रामएकवाल राय यादवले शिक्षाको दृष्टिकोर्णबाट अधिराज्यभरीमा रौतहट धेरै पछि परेको अवस्थामा स्थानीय तहबाट छोरीलाई विद्यालय अध्ययन गर्न प्रोत्साहन गर्न साइकल वितरण अति नै सराहनिय कार्य भएको बताए । छोरा शिक्षित भए एक परिवार मात्रै शिक्षित हुने तर छोरीलाई साक्षर बनाएमा दुई परिवार शिक्षित तथा सभ्य परिवारको निर्माण हुने भएको हुँदा दुर्गा भगवती गाउँपालिकाबाट साइकल वितरण कार्यबाट सामुदायिक विद्यालयमा छोराछोरीलाई अध्यापन गराउन प्रेरणा मिल्ने विश्वास व्यक्त गरे ।

प्रमुख जिल्ला अधिकारी किरण थापाले विद्यालय जान टाढा रहेका कारण कतिपय अवस्थामा अभिभावकहरु छोरीलाई अध्ययन गर्न विचमै छोडाउने बानी तराईका जिल्लाहरुमा विकसित रहेको हुँदा आज गाउँपालिकाद्धारा छोरीहरुलाई साइकल वितरण मार्फत विद्यालय शिक्षालाई अनिवार्य रुपमा पुरा गर्नमा मद्दत पुगेको जिकिर गरे ।

प्रदेश सरकार र संघिय केन्द्रीय सरकार पनि सामुदायिक विद्यालय प्रति जनताहरुको झुकाव एवं भर्ना गराउन विभिन्न अभियान चलाइरहेको बताउदै उनले यस्ता किसिमको कार्यक्रमबाट छोरीहरुलाई विद्यालय शिक्षा प्रति जागरुक्ता बढाने बताए । गाउँपालिका अध्यक्ष अरुण साहले छोरीलाई राम्रो शिक्षा दिएर मात्रै उनीहरुलाई आत्मनिर्भर बनाउन सकिने छ ।

छोरी साक्षर नभए समाज तथा आउदो पुस्ता अशिक्षित भई सधै वेरोजगारी, गरिवी बढ्ने भएको हुँदा अनिवार्य रुपमा छोरीलाई उच्च शिक्षा दिएर केन्द्रीय सरकारको अभियान विहावारी २० बर्ष पारी जस्ता अभियानलाई समेत मद्दत पुग्ने बताए । शिक्षाले दाईजो, अन्धविश्वास जस्ता समाजमा व्याप्त रहेका कुरुतीहरुलाई निर्मुल पार्न सकिने भएको हुँदा दुर्गा भगवती गाउँपालिकामा गुणस्तरिय शिक्षा प्रदान गर्न र कोही पनि बालकालिकाहरु विद्यालय बाहिर नरहुन भने अभियानमा विभिन्न कार्यक्रमहरु संचालन गर्दै जाने स्पष्ट पारे ।

दुर्गा भगवती गाउँपालिका वडा नम्वर ३ मत्सरीका वडाध्यक्ष धर्मेन्द्रकुमार झा ९डिके० ले छोरीलाई आधारभुत शिक्षाको साथै उच्च शिक्षा हासिल गराउने लक्ष्य गाउँपालिकाले लिएको हुँदा आजको साइकल वितरणबाट छात्राहरु उच्च मनोवलका साथ शिक्षा आर्जन गर्न सुझाव दिए । साइकलको लागि मात्रै अभिभावकहरु विद्यालयमा आएर झगडा नगर्न आग्रह गर्दै विद्यालयमा गुणस्तरिय शिक्षा प्रदान भईरहेको छ कि छैन सोको अवलोकन तथा निरीक्षण गरेमा यहाँको शिक्षामा गुणत्मक विकास हुने बताए ।

स्वागत मन्तव्य दिदै युवा नेता झाले शिक्षा विना कुनै कार्य गर्न नसकिने भएकोले घरका सवै कार्य छाडी विद्यालय शिक्षा अनिवार्य रुपमा लिन उपस्थित सम्पूर्ण छात्रछात्राहरु संग अपिल गरे ।

“संस्कृत मावि मत्सरीमा कक्षा ९ मा अध्ययनरत छात्रा काजल झाले विद्यालय तथा टिउसन जान निकै कठिनाई भईरहेका थिए, कतिपय अवस्थामा विद्यालयको अध्ययन छाड्न विवशता बढ्दै जाँदा म जस्ता २५३ जनालाई गाउँपालिकाबाट साइकल उपहार स्वरुप पाउदा निकै खुशी लागेको बताइन ।

हामी अध्ययन गर्न चाहन्छु तर विभिन्न परिस्थितिका कारण विद्यालयको पढाई विचमै छोड्नु पर्ने हाम्रो विवशतालाई पनि स्थानीय तह वा नेपाल सरकारले बुझनुपर्दा म जस्ती कयौं चेलीहरुको भविष्य उज्जवल हुनेछ तर जे भएपनि साइकल उपहार प्रदान गर्ने गाउँपालिका प्रति आभार व्यक्त गरिन ।”