डा. सिके राउत र नेकपा सरकारबीच भयो यस्तो सहमति ?

न्यूज ब्यूरो, काठमान्डौँ । विहिबार मात्र हिरासतमुक्त भएका स्वतन्त्र मधेश गठबन्धनका सँयोजक डा. सिके राउत र नेकपामा सरकारबीच जन अभिमतको सहमति भएको छ ।

सरकार र स्वतन्त्र मधेश गठबन्धनबीच मधेशको माग जन अभिमतमा आधारित लोकतान्त्रिक विधिमार्फत पूरा गर्ने लगायतका ११ बुँदे सहमति भएको हो ।

प्रधानमन्त्री केपी शर्मा ओली, नेकपाका अर्का अध्यक्ष पुष्पकमल दाहालको उपस्थितिमा सरकारका तर्फबाट गृहमन्त्री रामबहादुर थापा र स्वतन्त्र मधेश गठबन्धनका तर्फबाट सीके राउतले हस्ताक्षर गरेका छन्।

यी हुन् सहमतिका बुँदा
१. मुलुकको स्वाधीनतालाई स्विकार्ने।
२. लोकतान्त्रिक प्रक्रियाबाट समस्या समाधान गर्ने।
३. असन्तुष्टि समाधान गर्ने।
४. राउतको संगठनमाथि लागेका मुद्दा फिर्ता लिने।
५. राउतको संगठनले निकालेका किताब, गीत तथा अन्य प्रचार सामग्री प्रयोगमा नल्याउने।
६. विखण्डनवादी क्रियाकलाप नियन्त्रण गर्ने।
७. संविधानको भावनाअनुसार राजनीतिक मूलधारमा आउन सक्ने।
८. गत भदौ १५ गते बाँकेमा मारिएका राम मनोहर यादवको परिवारलाई क्षतिपूर्ति र परिवारका सदस्यलाई रोजगारीको व्यवस्था गर्ने।
९. घाइतेहरुको सरकारले उपचार गर्ने।
१०. राउतको संगठनका कार्यकर्तामा भएको सिपलाई राष्ट्रको हितका लागि उपयोग गर्ने।
११. सहमति आजैबाट लागू हुने।

राउत यसअघि स्वतन्त्र मधेसको एजेन्डासहित गतिविधि गरिरहेका थिए। जिल्ला अदालत रौतहटको आदेशपछि पुर्पक्षका लागि थुनामा गएका राउत सर्वोच्च अदालतको आदेशमा हिजोमात्रै रिहा भएका थिए।

राउत लामो समयदेखि मधेसलाई नेपालबाट छुट्याउनुपर्ने अभियानमा थिए। मधेसलाई राज्यले दमन गरेको भन्दै उनले मधेसमा छुट्टै सेना हुनुपर्ने समेत बताउँदै आएका थिए।

राष्ट्रिय सभागृहमा आयोजति समारोहलाई राजनीतिक सहमति घोषणा कार्यक्रमको नाम दिइएको छ। हिजोमात्रै सर्वोच्च अदालतबाट सीके राउतलाई रिहाको आदेश भएको थियो। त्यसको भोलिपल्टै यस्तो सहमति भएको हो।

राजनितिक सहमति नाम दिएको उक्त कार्यक्रममा उनी अलगै मधेश छुटयाउने अभियानमा लागेदेखि इतिहासमै पहिलो पटक मँचबाट उनले नेपाली भाषामा सम्बोधन गरेका हुन् ।