डा. सिके राउतका ७ समर्थक रिहा, २ जेल चलान

न्यूज ब्यूरो, जनकपुरधाम । स्वतन्त्र मधेश गठबन्धनका ७ कार्यकर्तालाई बाँके जिल्ला अदालतले रिहा गरेको छ ।

आईतबार चलेको बहसपछि डा. सिके राउत नेतृत्वको स्वतन्त्र मधेश गठबन्धनका ७ कार्यकर्ता धरौटी तथा साधारण तारेखमा रिहा भएका छन् भने दुई जना धरौटी नतिरेपछि र एक जना पूर्वपक्षको लागि जेल चलान भएको गठबन्धनका प्रवक्ता अब्दुल खानले जानकारी दिए ।

गठबन्धनसँग आवद्ध मोरँग जिल्लाको विराटनगर बस्ने श्रीराम चौधरी पूर्वपक्षको लागि जेल चलान भएका छन् भने रौतहटका बीरेन्द्र साह समेत ५० हजार माग गरिएको धरौटी नतिरेर जेल चलान भएका छन् । विरेन्द्र साहलाई राज्य विरुद्धको विप्लव मुद्दामै ५० हजार धरौटी राखेर रिहा गर्ने भनिएपनि धरौटी भने उनले नतिरेर जेल जान स्वीकार गरेका हुन् ।

बाँके जिल्ला अदालतबाट पक्राउ गरिएका सिके राउतका समर्थकहरुमध्ये ५० हजार रुपैयाँ धरौटी तिरेर सिरहाका सुदिपराज कुशवाहा र विरगँज पर्साका सँजय कुमार साह रिहा भएका छन् । यस्तै, महोत्तरीका सँजय यादव र सँतोष मण्डल, सिरहाका विष्णुदेव ठाकुर र विनोद यादव तथा सुनसरी जिल्लाका सत्यनारायण साहलाई अदालतले साधारण तारेखमा रिहा गरेको प्रवक्ता खानले जानकारी दिए ।

स्वतन्त्र मधेश गठबन्धनका सँयोजक डा. सिके राउतलाई पूर्वपक्षकै लागि कैयौँ महिनादेखि थुनामा राखिएको हो ।