आजदेखि मधेशभर 'छोरी शिक्षा विमा' लागू

न्यूज ब्यूरो, जनकपुरधाम । मधेश सरासरको मुख्यमन्त्री बेटी पढाउ बेटी बचाउ कार्यक्रम अन्तर्गत प्रदेशको ८ वटा पालिकाबाट शुरु भएको छोरी शिक्षा विमा कार्यक्रम आजदेखि प्रदेश भरि लागु भएको छ । माघ १ गतेबाट नै लागू हुने गरि प्रदेश भरि यो योजना कार्यान्वयनमा ल्याइएको हो ।

प्रदेश सरकारले यस कार्यक्रम अन्तर्गत माघ १ गते पछि जन्मिएको बालिकाहरुलाई १ लाख २५ हजारको विमा गर्ने छन । सो विमाको लागि प्रदेश सरकारले प्रभु बैंक संग सम्झौता समेत गरि सकेको छ ।

प्रदेश सरकारले नवजात बालिकाको नाउमा एक मुष्ट रकम जम्मा गरेपछि २० वर्ष पछि बैंकले बालिकालाई १ लाख २५ हजार रकम एकमुष्ट उपलब्ध गराउने छ । तर शिक्षाको लागि रकमको आवश्यकता परे प्रदेश सरकारको सिफारिसमा विचमा समेत केही रकम झिक्न पाउने व्यवस्था गरिएको छ ।

विमाको लागि नवजात छोरीको फोटो, आमा वा बुवाको नागरिकता, जन्म दर्ताको प्रमाणपत्र र वडा सिफारिस आवश्यक रहेको छ । छोरी विमा कार्यक्रमलाई सफल बनाउन प्रदेश सरकारले स्वयंसेवक समेत परिचालन गर्ने छ ।

यस कार्यक्रमका लागि संघीय सरकारले समेत ५० करोड विशेष अनुदान उपलब्ध गराएको छ ।