महोत्तरीमा दुई मोसा एकआपसमा ठोक्किदाँ एकको मृत्यू, दुई गम्भिर !

न्यूज ब्यूरो, महोत्तरी । महोत्तरीमा दुई मोटरसाईकल (मोसा) एक आपसमा ठोक्किन जाँदा एक जनाको मृत्यू भएको छ ।

सोमबार (आज) अपरान्ह माइस्थान–सम्सी सडकखण्ड अन्तर्गत गौशाला नगरपालिका वडा नं. ४ स्थित रहेको प्राथमिक स्वास्थ्य केन्द्र नजिकै भएको मोटरसाईकल दुर्घटनामा परी महोत्तरीको बर्दिवास नगरपालिका वडा नं. ३ गौरीडाँडाँ बस्ने अन्दाजी वर्ष २४ का विवेकबहादुर जंघिङ्गको मृत्यु भएको जिल्ला प्रहरी कार्यालय महोत्तरीले जनाएको छ ।

जिल्ला प्रहरी कार्यालय महोत्तरीका अनुसार, बर्दिवासबाट सम्सीतर्फ गइरहेको ना ३६ प ५११० र विपरित दिशाबाट आईरहेको ज १२ प ४४९७ नम्बरको मोटरसाइकल एकआपसमा ठोक्किँदा जघिंङ्ग गम्भिर घार्इते भएका थिए । टाउकोमा गम्भीर चोट लागेको जघिंङ्गको बर्दिवासस्थित जनसेवा हस्पिटलमा उपचारको क्रममा मृत्यु भएको प्रहरीले जनाएको छ ।

सो दुर्घटनामा परि बर्दिवास बुद्धचोकका ३६ वर्षीय ताराबहादुर खडका र सोनमा गाँउपालिका २ का २६ वर्षीय लालेन्द्र साह गम्भीर घाइते भएका छन् । खडका र साहको बर्दिवासमा उपचार भइरहेको प्रहरीले जानकारी दिएको हो ।