कमला नगरपालिकामा विकासको लहर ल्याउँछौँ : अधिकृत यादव

न्यूज ब्यूरो, जनकपुरधाम । धनुषाको पूर्वी भेकमा रहेको कमला नगरपालिकामा विकासका कार्यहरुमा तीव्रता थपिएको छ ।

राज्य पुनः संरचना भएपछि गठन गरिएको स्थानीय तहहरुमध्ये धनुषाको एक मात्र कमला नगरपालिकामा शून्य विकास स्थिति रहेको बेला आएका प्रमुख प्रशासकीय अधिकृत उमेश यादवले त्यस आँकडालाई अघि बढाएका छन् ।

नगरपालिका गठन भएको दुई वर्षमा विभिन्न पालिकाहरुले विकास निर्माणलाई मूर्तरुप दिरहेका बेला कमला नगरपालिकामा स्थानीय जनप्रतिनीधिहरुकोबीचको खाडलका कारण विकास शून्य भएको थियो । प्रमुख प्रशासकीयको रुपमा उमेश यादव आएपछि स्थानीय जनप्रतिनीधिहरुबीच एकरुपता ल्याउँदै विकासको बाटो समेत खुलाउन सफल भए ।

न्यूज ब्यूरोसँग कुराकानीमा अधिकृत यादवले भने, - "कमला नगरपालिकामा शून्य विकासको अनूभूति जनताले गरिरहेका बेला जनमुखी विकासको लागि बिडा उठाउनु मेरो कर्तव्य थियो । यहाँका जनप्रतिनीधिहरुमा एकता कामय गर्दै विकासको बाटो खोल्नु त्यतिकै सजिलो थिएन, तर जनचाहना र जनभावनालाई कदर गर्दै एकतारुपता कायम गर्दै विकासको बाटो खुलाएको छु । अब यस नगरपालिकामा विकास निर्माणको कार्यहरुलाई तीव्रता दिनेछौँ ।"

नगरपालिकाको कार्यालय बारे विवाद चुलिएपछि स्थानीय जनप्रतिनीधिहरुबीच दुरी बढेको थियो जसको फलस्वरुप नगरका सर्वसाधारणहरु मारमा परेका थिए । केही महिनाअघि मात्र सरुवा भएर कमला नगरपालिकमा आएका अधिकृत यादवले उनीहरुबीचको दुरीलाई हटाउँदै जनचाहना र जनमतलाई कदरको लागि बाटो सुझाएपछि विकासको बाटो खुलेको हो ।

नगरपालिका गठन भएदेखि नै अहिलेसम्म एक पटक पनि नगरसभा नभएको अवस्थामा अधिकृत यादवले प्रथम नगरसभा गराउन सफल भएका हुन् । उनले कार्यालय व्यवस्थापनका कार्यहरु गरिदिएपछि विधिवत रुपमा नगरपालिकाको कार्यालय सँचालनमा आएको बताए ।

उनले भने, - "यसअघि त जनकपुरबाटै कार्यालय सँचालनमा रहेको थियो, जसको कारण जनताले न त कहिले जनप्रतिनीधि भेटाउन सकिन्थ्यो नत विकास निर्माणको कार्याहरुको लागि कुनै पहल नै हुन सकेको थियो । अहिले कार्यालय व्यवस्थापन गरिदिएपछि कर्मचारी, जनप्रतिनीधि समयमा कार्यालय पुग्न थालेपछि आम जनतालाई सहजता महसुस भएको छ ।"

उनले नगरसभापछि विद्यालयहरुमा प्रधानाध्यापकहरुको हकमा विद्यालय सुधार योजना, स्वास्थ्य क्षेत्रमा भौतिक संरचनाको दृढ लक्ष्य, नगरपालिकामा करको दर निर्धारणहरु टुँगो लगाएपछि नगरपालिकाका साधारण कार्यहरु नियमिति सँचालनमा रहेको बताए ।

जनतालाई निकास दिनको लागि सडक निर्माण कार्यलाई प्राथमिकतामा राख्दै सडक निर्माण कार्यको लागि बजेट विनियोजन गरी प्रथम चरणमा सडक निर्माणका कार्यहरुलाई तीव्रता दिएको बताए । यसपछि शिघ्र नै कृषि क्षेत्रमा माछा सुपरजोन, धान जोन लगायतका प्रमुख योजनाहरु नगरपालिकामा सँचालन गरिने थपे ।

अधिकृत यादव नगरपालिकामा आएपछि नगरका जनताहरुमा विकास निर्माणप्रति जागरुकता तथा आत्म विश्वास जागेर आएको देखिएको छ । अधिकृत यादवको कार्यलाई जनप्रतिनीधिहरुले पनि सराहना गरे ।