होसियार ! सरस्वति पूजाको नाममा रकम असुल गर्ने विद्यालय उपर कारवाही हुने

जनकपुरधाम, १९ माघ । धनुषाको विभिन्न समुदायिक तथा गैर समुदायिक विद्यालयहरु विद्याकी देवी मानिने सरस्वति पूजाको नाममा विद्यार्थीहरुबाट अवैद्य रुपमा चन्दाको नाममा रकम असुल गर्ने गरेको गुनासोपछि सरोकारबाला एक्सनमा आएको छ ।

जिल्ला प्रशासन कार्यालय धनुषा (सिडिओ अफिस) ले गत माघ १७ गतेको चलानी नं. ६७९१ को पत्रबाट आगामी माघ २७ गते मनाउन लागिएको सरस्वति पूजाको नाममा विद्यालयहरुले रकम असूल गरिरहेको गुनासो बढेपछि त्यस्तो असुली गर्ने विद्यालय उपर कारवाही गरिने ह्वीप जारी गरिएको छ ।

सरस्वति पूजाको नाममा विभिन्न विद्यालयहरुले आफ्नो राजीखुसी मनपरी ढँगले विद्यार्थीहरुबाट रकम असुल गरिरहेको जन गुनासो बढेकाले आवश्यक कारवाही गरी सुशासन कायम गर्नुपर्ने भनी लेखी आएकोले सरस्वति पूजाको नाममा कुनै किसीमको रकम असुल नगर्न नगराउनु जानकारी एक प्रेस विज्ञप्ति मार्फत गराइएको छ ।

जिल्ला प्रशासन कार्यालय धनुषालाई बोधार्थ गर्दै जनकपुरधाम उपमहानगरपालिकाको कार्यालयले सामुदायिक तथा सँस्थागत विद्यालयलाई सरस्वति पूजाको नाममा कुनै प्रकारको असुली नगर्न शिक्षा, युवा तथा खेलकूद महाशाखाका उपसचिव मेहिलाल यादवद्धारा हस्ताक्षरित सूचनामा उल्लेख गरिएको छ ।