सप्तरीमा दोहोरो फायरिङ, प्रहरी ईन्काउन्टरमा १ जना मारिए !

न्यूज ब्यूरो, सप्तरी । सप्तरीमा प्रहरीको ईन्काउन्टरमा परी एकजना मारिएका छन् । सप्तरीको रुपनी नजिकै प्रहरी टोलीसँग भएकाे मुडभेडमा प्रहरीले गरेको कारवाही फायरिङमा दिपेन्द्र जयसवल भन्ने दीपेन्द्र चौधरी मारिएका हुन् ।

प्रदेश प्रहरी कार्यालय जनकपुरधामबाट खटेको प्रहरी टोलीसँगको मुठभेडमा उनको मृत्यु भएको प्रहरी प्रमुख हरिबहादुर पालले पुष्टि गरेका छन् ।

उनका अनुसार, प्रहरीलाई देख्नेवित्तिकै दीपेन्द्रले प्रहरीमाथि नै एक राउण्ड फायरिङ गरेपछि प्रहरीतर्फबाट पनि कारवाही फायरिङ भएको थियो । प्रहरीले चलाएको २ गोली लागेका चौधरीको घटनास्थलमै मृत्यु भएको पालले जनाए ।

एक साताअघि सप्तरीमै प्रहरी हवल्दार महेन्द्र चतरी यादवमाथि गोली प्रहार गरेको घटनामा उनको संलग्नता रहेको प्रहरीले जनाएको छ ।

मोटरसाइकलमा आएका समूहको गोली प्रहारपछि प्रहरी हवल्दार यादव घाइते भएका थिए । सप्तरीको खडक नगरपालिका अन्तरर्गत बोदे बर्साइन जाने बाटोमा ड्युटीमा खटिएका उनीमाथि गोली प्रहार भएको थियो ।

उनी २०७२ सालमा प्रहरी असई रमेश सुब्बाको हत्यामा संलग्न समेत भएका अपराधी भएको बताइएको छ । त्यतिबेला उनले प्रहरीको भ्यानमाथि एम्बुस थापेर सो घटना घटाएको प्रहरीको दाबी छ ।

यस्तै उनी अरु विभिन्न आपराधिक कार्यमा पनि संलग्न भएको पाइएको प्रहरीले जनाएको छ ।

तराईको सशस्त्र समूह गोइत समूहको पूर्वकार्यकर्ता उनले अहिले आफ्नै समूह बनाएर चन्दा असुली, हप्ता असुली गरी भूमिगत गतिविधि सञ्चालन गर्दै आएको जनाइएको छ ।