थप्पड प्रकरण ! - 'सचिव झालाई ईलाजको जरुरी छ' : मन्त्री यादव

जनकपुरधाम, ३० पुस । आईतबार प्रदेश नं. २ मा भएको सचिव उपर मन्त्रीको थप्पड प्रकरणमा आर्थिक मामिला तथा योजना मन्त्री विजय यादवले सचिव झालाई ईलाजको आवयश्कता रहेको बताएका छन् ।

आईतबार दिउँसो प्रदेश नं. २ को वन मन्त्रालयका सचिव विद्यानाथ झालाई मन्त्री यादवले थप्पड हानेको भन्दै सचिव झाले उनलाई अभद्र गालीगलौज गरेको भिडियो समेत सार्वजनिक भएपछि मन्त्री यादवले उनलाई उपचारको आवश्कता रहेको बताएका छन् ।

सोमबार साँझ न्यूज ब्यूरोसँग कुराकानी गर्दै अर्थमन्त्री यादवले भने,- "मलाई लाग्छ सचिव झाको मेन्टल डिस्अर्डर छ , देशको नागरिक तथा राष्ट्रसेवक कर्मचारी भएकोले पनि उनलाई प्रदेश सरकारले तत्काल उपचार गराउनुपर्छ । आईतबार भएको घटनामा उनको प्रतिक्रिया देख्दा सचिव झा समान्य नभएको जस्तो लाग्यो । उनलाई ईलाजको जरुरी छ ।"

उक्त घटनामा सचिव झाले नै मन्त्री यादव उपर दुव्र्यवहार गरेको प्रत्यदर्शी प्रदेश नं. २ का सभामुख सरोज यादवले प्रतिक्रिया समेत दिएका छन् । मन्त्री यादवले समेत सचिव झालाई आफू कुनै प्रकारको त्यस्तो व्यवहार नगरेको दाबी गर्दै आएका छन् ।

मन्त्री यादवले भने, - "कत्तै न कत्तै संघीयतालाई फेल गर्नको लागि यस्ता षडयन्त्रहरु रचिदैछ प्रदेश २ को सरकार उपर । भनाभन भएपछि नै केही मिनटमै केही पत्रकारहरुको समूह नै आउनु भनेपछि यी घटना सुनुयोजित जस्तो देखिएकोले संघीयता फेल गर्न षडयन्त्र भएको हुनुपर्छ । कार्यालयमा हल्ला भएको दुई मिनेटमै कसरी र कहाँबाट आए त्यतिका पत्रकारहरु ? शंका त त्यहाँ उब्जिएको छ । तर, सचिव विद्यानाथ झालाई चैँ उपचारको जरुरी छ ।"

यसअघि पनि सचिव झाको विगतका व्यवहारहरुलाई मध्यनजर गर्दै मन्त्री यादवले उनलाई प्रदेश सरकारले नै उपचार गराउनुपर्ने बताएका छन् । छानबिन समिति गठन भएपछि यस प्रकरण बारे छानबिनको निष्कर्ष निकाल्ने मन्त्री यादवले थपे ।