रेशम चौधरीलाई थुनामै राख्न सर्वोच्चको आदेश, अब थुनाबाटै लड्ने

न्यूज ब्यूरो, जनकपुरधाम । राजपा सांसद रेशम चौधरीलाई सर्वोच्च अदालतले थुनामै राख्न आदेश दिएको छ । कैलाली क्षेत्र नम्बर १ बाट निर्वाचित सांसद चौधरीलाई थुनामै राख्न सोमबार आदेश जारी गरिएको हो ।

चौधरीले अब थुनामै बसेर मुद्दा लड्ने छन् । ईश्वरप्रसाद खतिवडा र पुरुषोत्तम भण्डारीको संयुक्त ईजलासले उनलाई थुनामै राखेर मुद्दा अघि बढाउन आदेश दिएको हो ।
टीकापुर घटनामा मुख्य दोषी देखाउँदै चौधरीविरुद्ध सरकारले कर्तव्य ज्यान मुद्दा दायर गरेको छ । कैलाली जिल्ला अदालतले चौधरीलाई पुर्पक्षका लागि थुनामा पठाएको थियो ।

२०७४ फागुन १४ मा कैलाली जिल्ला अदालतले उनलाई पुर्पक्षका लागि थुनामा पठाउने आदेश दिएको थियो । त्यसपछि चौधरीले उच्च अदालत दिपायलमा पुनरावेदन हालेका थिए ।

उच्च अदालतले पनि चैत २२ गते सुरु जिल्ला अदालतको आदेशलाई सदर गरेको थियो । चौधरी उच्च अदालतको आदेशपछि सर्वोच्चमा आएका थिए । सर्वोच्चले उच्च अदालतको आदेश मनासिव नै देखिँदा अन्यथा परिवर्तन गरिहरन नपर्ने आदेश सुनाएको हो ।

बिहीबार सिंहदरबारमा सांसदको शपथ खाएका उनी डिल्लीबजार हाल कारागारमा छन् ।