अब जन्मिने बालिकाको बीमा मधेश सरकारले गरिदिने

जनकपुरधाम, ६ पुस । 'बेटी पढाउ बेटी बचाउ' अभियान अन्तर्गत प्रदेश नं. २ का मुख्यमन्त्री मो. लालबाबू राउतले मधेशमा जन्मिने हरेक बालिकाको बीमा मधेश सरकारले गर्ने बताएका छन् ।

मुख्यमन्त्री राउतले बेटी बचाउ बेटी पढाउ अन्तर्गत माघ १ गते देखी जन्मीने बालिकाहरुको लागि प्रदेश सरकारले विमा गर्न लागेको जानकारी गराए । उनले पहिलो चरणमा ८ वटै जिल्लाबाट दलितहरुको बाहुल्यता रहेको एक एक पालिकालाई छनौट गरेर विमा कार्यक्रम संचालन गरिने उल्लेख गरे । उनले अगामी आर्थिक वर्षबाट यो योजना प्रदेश भरिनै लागु गर्ने योजनामा आफुहरु रहेको खुलासा समेत गरेका छन् ।

समान अधिकार र महिला हिँसा न्यून तथा गर्भमै छोरीको हत्या गरिरहेको मानसिकतालाई परास्त गर्न प्रदेश सरकारले छोरी शिक्षित बनाउन लागेको हुन् । एउटा घरमा एक महिला शिक्षित भए सिँगो परिवार नै समृद्धिको बाटो लाग्ने तर्क सहित मुख्यमन्त्री राउतले बेटी पढाउ, बेटी बचाउ अभियान सुरु गरेका छन् । छोरी भएपछि विहेबारीको लागि धेरै खर्च लाग्ने मानसिकताका कारण महिला हिँसा र भ्रुण हत्या बढदै गएको भन्दै त्यसलाई निराकरणको लागि मुख्यमन्त्रीले छोरी जन्मिएलगत्तै उनको बीमा प्रदेश सरकारले गर्ने प्रतिवद्धता जनाएका छन् ।

१२ औ पूर्वक्षेत्रीय नेत्र सम्मेलनको आज सिरहाको लहान स्थित सगरमाथा चौधरी अस्पतालमा उद्घाटन गर्नु हुँदै मुख्यमन्त्री राउतले आँखा उपचारको सेवामा नेपालले ठूलो फडको मारे पनि यसलाई अझै गुणात्मक बनाउनु पर्नेमा जोड दिएका हुन् । मुख्यमन्त्री राउतले आँखाको उपचार सम्बन्धि सेवा परिणात्मकका साथै गुणात्मक समेत हुनु पर्नेमा जोड दिँदै समाजको हरेक तप्का सम्म आँखा उपचारको सेवालाई पु¥याउन पर्नेमा जोड दिँदै यसका लागि प्रदेश सरकारले गर्न सक्ने हरेक प्रकारको सहयोग गर्न तयार रहेको उल्लेख उल्लेख गरे ।

मुलुकको मात्र नभई विश्वको तेस्रो अस्पतालमा रहेको सगरमाथा चौधरी अस्पताल प्रदेश नं. २ को लागि गौरबको विषय रहेको उल्लेख गर्दै उनले अस्पताललाई अझ परिस्कृत गर्न प्रदेश सरकार प्रतिवद्ध रहेको बताए ।

प्रतिनिधिसभा सदस्य एवं नेत्र ज्योति संघ सिरहाका अध्यक्ष पद्मनारायण चौधरीको अध्यक्षतामा भएको उक्त उद्घाटन सत्रमा नेपाल नेत्रज्योति संघका केन्द्रिय अध्यक्ष तीर्थ प्रसाद मिश्र, पूर्वाञ्चल क्षेत्रीय आँखा कार्यक्रमका निर्देशक डा. श्याम पोखरेल, डा. संजय सिंह सहितका वक्ताहरुले शुभकामना मन्तव्य राखेका थिए ।