पोलि क्लिनिकको त्रुटिपूर्ण शल्यक्रियाले सुत्केरीको ज्यान गयो !

न्यूज ब्यूरो, सिरहा । सिरहाको लहानमा एक पोलि क्लिनिकमा एकजना सुत्केरीको अकालमै ज्यान गएको छ । लहानस्थित गुरुकुल पोलि क्लिनिकमा चिकित्सकको त्रुटिपूर्ण शल्यक्रियाले मिर्चैया नगरपालिका ११ सितापुरका जगदिश पासमानकी २१ वर्षीया श्रीमति सञ्जु पासमानको ज्यान गएको हो ।

व्यथा लागेपछि बुधबार साँझ करिब ४ बजेतिर माइतीघर गोलबजारबाट सञ्जुलाई सुत्केरी गराउन गोलबजार स्वास्थ्य चौकीमा घरपरिवारले लगेका थिए । त्यहाँ सामान्य चेकजाँच पछि चिकित्सकले लहानस्थित सरकारी अस्पतालमा रिफर गरेको थियो । त्यँहा पनि सामान्य रुपमा बच्चा नजन्मेपछि बुधवार राति नै करिब ८ बजे महिलालाई धरान अथवा बिराटनगर लैजान अस्पतालले जबाब दिएका थिए ।

लहानबाट बाहिर लैजाने तयारीमा रहेका सञ्जुका परिवारलाई एक एम्बुलेन्स चालकले लहानकै गुरुकुल पोलि क्लिनिकमा भइहाल्छ भनेर सुझाव दिए । बाहिर लैजान खोजेपनि अवस्था झनझन गम्भीर हुन थालेपछि उनको परिवारले स्विकार गर्न बाध्य भए । पीडाले छटपटिरहेकी सञ्जुलाई अन्ततः उनको परिवारले गुरुकुल पोलि क्लिनिकमा भर्ना गरायो ।

क्लिनिकमा भर्ना भएको केहि बेरपछि चिकित्सकले सञ्जुलाई शल्यक्रिया गर्नुपर्ने जानकारी परिवारलाई गराए । क्लिनिकलाई भने शल्यक्रिया गर्न नेपाल सरकारबाट अनुमति छैन । त्यति जान्ने बुझ्ने नभएका उनको परिवारले शल्यक्रियाका लागि मन्जुर भए । त्यसपछि शल्यक्रिया गरेर बच्चा निकालियो ।

केहि बेरपछि चिकित्सकले सञ्जुको शरिरमा रगतको अभाव रहेको र उनलाई रगत चढाउनुपर्ने आवश्यक्ता रहेको भन्दै रगत ल्याउन भन्यो । सञ्जुको अवस्था झनभन नाजुक बन्दै गइरहेको थियो । रातिसम्म त्यहीँ राखियो । आज (बिहिबार) विहान उनलाई क्लिनिकले बिराटनगर लैजान जबाब दिए । त्यसपश्चात् उनलाई अक्सिजन लगाएर बिराटनगर पठाइयो । बिराटनगरमा अस्पतालले लगत्तै सञ्जुलाई मृत घोषणा गरेको हो । बच्चाको अवस्था भने सामान्य छ ।

क्लिनिकलाई कारवाही र क्षतिपूर्तिको मागसहित शवलाई अहिले लहानमै राखिएको छ ।

परिवारजनले सञ्जुको लहानमै मृत्यू भइसकेको र मृत्यू पश्चात् त्यहाँबाट रिफर गरिएको दुखेसो पोखेका छन् । उनीहरुले राति नै त्यहाँबाट पनि बाहिर लग्न खोज्दा उल्टै क्लिनिकका चिकित्सकले झपाडेको र मृत्यू भइसकेपछि रिफर गरेको आरोप लगाएका छन् ।

मृतक सञ्जुको परिवारले चिकित्सकले त्रुटिपूर्ण अपरेशन गर्दा ज्यान गएको भन्दै शल्यक्रियमा संलग्न चिकित्सक तथा क्लिनिकलाई कारवाही गर्न माग गरेका छन् । क्लिनिकलाई कारवाही र क्षतिपूर्तिको मागसहित शवलाई अहिले लहानमै राखिएको छ ।

सञ्जु पहिलो पटक आमा बन्न लागेकी थिइन् । मृतक सञ्जुको पति जगदिश पासमान वैदेशिक रोजगारीको शिलशिलामा खाडी मुलुक कत्तारमा छन् । श्रीमतिको मृत्यूको खवरपछि जगदिश पनि शुक्रबार नेपाल आउँदैछन् । सञ्जुको मृत्युपछि सिँगो टोल नै सोकमा डुबेको छ ।

यता, क्लिनिकका सञ्चालक फरार छन् भने प्रतिक्रिया लिन खोज्दा सम्पर्क हुन सकेन ।