धरौटी रकम अस्विकार गर्दै डा. सिके राउतका समर्थक जेल जान तयार  !

न्यूज ब्यूरो, जनकपुरधाम । स्वतन्त्र मधेश गठबन्धनका सँयोजक डा. सिके राउतका समर्थक एवम् कार्यकर्ता अदालतले तोकेको धरौटी अस्विकार गर्दै जेल जान मन्जुर गरेका छन् ।

शुक्रबार नवलपरासी जिल्ला अदालतले एउटै मुद्दामा गिरफ्तार भएका कैलाश महतो र श्रीकृष्ण यादवलाई एउटै ईज्लाशले दुई फरक प्रकारको धरौटी रकम माग गरेको हो । महतोलाई २ लाख ५० हजार धरौटी र यादवलाई १ लाख ५० हजार धरौटीको माग आदेश गरेको छ।

महतोलाई त्यही मुद्दामा सिरहा जिल्ला प्रहरीकार्यालयले पक्राउ पुर्जी जारि गरी मागिरहेकोले उनलाई आजै सिरहा लगिने स्वतन्त्र मधेश गठबन्धनका प्रवक्ता अब्दुल खानले जानकारी दिए । प्रवक्ता खानले एक प्रेस नोट जारी गर्दै - " विनाकसुर बदनियत पूर्वक ६१ दिन सम्मा हिरासतमा राखि धरौटीको माग गर्दा दुवै जना धरौटी दिन अस्विकारगरि जेल जाना तयार छन। आज धनुषा जिल्ला अदालतले पनि १ लाख धरौटी तोकिदा संजय यादव पनि जेल जान तयार छन।" उल्लेख गरेका छन् ।

नेपालको प्रहरी प्रशासनले गर्न नसके पछि न्यालयले अनावश्यक आर्थिक भार दिई मानिसहरुको वाक स्वतन्त्रतालाई कुण्ठित गरिने कार्य गरिको प्रेस नोटमा उल्लेख छ । मधेशीहरुलाई मानसिक र आर्थिक कमजोर पारी स्वतन्त्रताको आवाज दबाउने कार्य गरिरहेको आरोप लगाइएको छ ।

उनीहरुलाई प्रहरीले पक्राउ गरी राज्य विरुद्धको संगठित अपराध, राज्य विप्लवको मुद्दा लगाउँदै पूर्वपक्षको लागि थुनामा राखेको थियो । सँजय यादव एक विद्यार्थी हुन र डा. सिके राउतका समर्थक पनि । यादवलाई रिहाईको लागि अदालतले १ लाख ५० हजार रुपैयाँ धरौटी माग गरेपछि एक विद्यार्थी उपर आर्थिक भार थोपेको दुःखेसो परिवारजनले पनि पोखेको छ ।

प्रदेश नं. २ का मुख्यमन्त्री मो. लालबाबू राउतलाई ज्ञापन पत्र बुझाउन जाँदा उनलाई मुख्यमन्त्री कार्यालयबाटै जिल्ला प्रहरी कार्यालय धनुषाले पक्राउ गरी राज्य विप्लवको मुद्दा चलाएको थियो ।