विवाहपँचमीः औसत ७ हजारबढी श्रद्धालु भित्रिदै !

न्यूज ब्यूरो , जनकपुरधाम । विदेह राजा जनकको नगरी जनकपुरधाममा परापूर्वकालदेखि लाग्दै आएको विवाहपँचमी महोत्सवमा दर्शनार्थीहरुको घुइँचो देखिएको छ । यसपालिको विवाहपँचमी महोत्सवमा भारत यूपी राज्य (उत्तर प्रदेश) का मुख्यमन्त्री योगी आदित्यनाथ जनती (बराती) बनेर आउने भएपछि अन्य वर्षको तुलनामा यसवर्ष बढी श्रद्धालुहरु सहभागी भएका हुन् ।

आज जनकपुरको कु्नाकाप्चा, गल्लीकुच्ची लगायत हरेक ठाउँमा तिर्थालुहरु भरिभराउ देखिएको छ । विशेषतः विवाहोत्सव हुने प्रमुख स्थान जानकी मन्दिर र रंगभूमि क्षेत्रमा ठुलो संख्यामा तिर्थालुहरुको भिड लागेको छ भने विभिन्न नाकाहरुबाट आउनेक्रम जारी छ ।

नेपाल भारतका विभिन्न स्थानबाट रिजर्व बस, निजी गाडीलगायतका सवारी साधनमा प्रति घण्टा औसत ७ हजार बढी दर्शनार्थी जनकपुर भित्रिदैछन् ।

बाहिरबाट आउने तिर्थालुहरुको गाडीलाई ट्राफिक प्रहरीले नगर क्षेत्रभित्र प्रवेश दिएको छैन् । तिर्थालुका रिजर्व र निजी गाडीहरु जनकपुर प्रवेश गर्ने नाकामा पार्किङको व्यवस्था गरिएको छ ।

रामजानकी विवाहोत्सवमा सहभागी हुन आउने तिर्थालुको संख्या धेरै भएपछि जनकपुरस्थित होटल, लज र धर्मशालाको संख्या कम परेको छ । यहाँ उपलब्ध होटल, लज र धर्मशालाहरुमा तिर्थालु नअटाउने भएपछि सरोकारबालाहरुले वासका लागि ठाउँठाउँमा पण्डाल (टेन्ट) गाडेर व्यवस्थापन गरेका छन् भने जनकपुरको विभिन्न स्थानमा निःशुल्क स्वास्थ्य शिविरहरु समेत सञ्चालन गरिएको छ ।

विवाहपँचमी महोत्सवमा आज जनती बनेर योगी आदित्यनाथ जनकपुरधाम आउने भएपछि अन्य वर्षको तुलनामा यसपटक बढी श्रद्धालु देखिएको हो । यसपटकको भीडले अन्य वर्षको रेकर्ड तोड्न सक्ने आकलन गरिएको छ ।