मँसिर २६ गते सार्वजनिक विदा, जनकपुरमा दीपावली मनाइने

न्यूज ब्यूरो, जनकपुरधाम । मधेशको महामेलाको रुपमा लाग्दै आएको विवाहपँचमी महोत्सवलाई मध्यनजर गर्दै मँसिर २६ गते बुधबार विवाहपञ्चमीको दिन सार्वजनिक विदाको घोषणा गरिएको छ ।

प्रदेश नं. २ का सरकारले सूचना सन्देश जारी गर्दै मधेशको महापर्व र मँसिरे मेलाको रुपमा मनाउँदै आएको राजजानकी विवाह महोत्सव अर्थात् विवाहपञ्चमीको अवसरमाएक दिने सार्वजनिक विदा दिने निर्णय गरेको हो ।

जनकपुरधाम उपमहानगरपालिकाले विवाह पञ्चमीलाई भव्यरुपमा मनाउन सम्पूर्ण नगरवासीलाई आग्रह गरेको छ । नगरपालिकाद्वारा जारी गरिएको प्रेस विज्ञप्तिमा २६ गते जनकपुर शहरमा दीपावली मनाउन सर्वसाधरणलाई आग्रह गरिएको छ । उपमहानगरपालिकाभित्रको सम्पूर्ण विद्यालयको पठनपाठन बन्द गरी भव्यरुपमा दीपावली मनाउन आग्रह गरिएको छ ।

जनकपुरधाम उपमहानगरपालिकाले दुई दिन जनकपुरधाममा दिपावली मनाएर अयोध्याका जन्तीलाई स्वागत गर्न आग्रह गरिएको छ ।

मधेशको महोत्सवको रुपमा रहेको विवाहपञ्चमी महोत्सवमा जन्तीलाई स्वागत एवम् आम जनताको सेवा सुविधालाई मध्यनजर गर्दै प्रदेश सरकारले यसपाली विवाहपञ्चमीको अवसरमा एक दिनको सार्वजनिक विदा दिने घोषणा गरेको हो ।

जानकी मन्दिरले प्रत्येक वर्ष विवाहपञ्चमीको लागि आयोजन गर्दै आएपनि यसपाली प्रदेश नं. २ सरकारले ५० लाख रुपैयाँ थप उपलब्ध गराएपछि विवाहपञ्चमीलाई परापूर्वकालमा लाग्दै आएको जस्तै मनाउने तयारी पूर्ण गरिएको हो ।

केही वर्ष उता भारतको अयोध्याबाट रामले जन्ती लिएर जनकपुरधाम आउँदा हात्ति, घोडा, उँट, रथ चढेर आउने गरिन्थ्यो भने नेपालको राजनीतिक अस्थिरता सुरक्षालाई मध्यनजरका साथै जानकी मन्दिरको कमी कमजोरीका कारण विवाहपञ्चमीप्रतिको पौराणिक आकर्षण र मोह सर्वसाधारणबाट हटदै गएको थियो ।

तर, यसपाली भारतको अयोध्यामा राम मन्दिर निर्माणको लागि आफ्नो जीउ ज्यान लगाएका हिन्दुवादी नेता युपी राज्यका मुख्यमन्त्री योगी आदित्यनाथ आउने भएपछि लाखौँको सँख्यामा श्रद्धालुहरु जनकपुर आउने विश्वास लिइएको छ ।

त्यसैलाई मध्यनजर गर्दै प्रदेश सरकारले एक दिनको विदा घोषणा गरेको हो भने जनकपुरधाम उपमहानगरपालिकाले दुई दिन जनकपुरधाममा दिपावली मनाएर अयोध्याका जन्तीलाई स्वागत गर्न आग्रह गरिएको छ ।