विवाहपँचमीको चौथो दिन आज ‘तिल्कोत्सव’ मनाइँदै

न्यूज ब्यूरो, जनकपुरधाम । जनक नगरी जनकपुरधाममा जारी सप्ताहव्यापी रामजानकी विवाह महोत्सव अन्तर्गत् सोमबार (आज) चौथो दिन तिल्कोत्सव कार्यक्रम मनाइँदैछ । त्रेतायुगमा मर्यादा पुरुषोतम भगवान राम र जनक नन्दनी जानकीबीच भएको विवाहको सम्झनामा साधुसन्त र श्रद्धालुहरुले श्रद्धा र निष्ठा पुर्वक तिल्कोत्सव मनाउँदैछन् ।

तिल्कोत्सवमा भगवान रामलाई तिलक लगाउने गरिन्छ । तिलकोत्सव कार्यक्रममा जानकी मन्दिरबाट बाजागाजाका साथ अयोध्या मन्दिरको प्रतिनिधित्व गर्ने राममन्दिरमा १ सय १ वटा डालीमा विभिन्न प्रकारमा फलफूल तथा परिकारका मिष्ठानको पाहुर पठाउने परम्परा रहिआएको छ ।

भोली मंगलबार मटकोर कार्यक्रम गरिनेछ भने बुधबार भव्यता पूर्वक शुभ विवाहको आयोजना गरी विवाहपञ्चमी मनाइनेछ ।

यसपालि विवाहपँचमीमा भारत, उत्तर प्रदेशका मुख्यमन्त्री योगी आदित्यनाथ समेत जन्ती बनेर आउँदैछन् ।

विगतका वर्षको तुलनामा यसवर्ष बढी दर्शनार्थी सहभागी हुने देखिएपछि सुरक्षा व्यवस्था चुस्तदुरुस्त पारिएको छ ।